ÁLEM APTA ІShІNDE: 266-shy Rım Papasy - ıslam men hrıstıan arasyndaǵy tatýlastyqtyń úmiti

Argentınalyq 76 jastaǵy kardınal-ıezýıti Horhe Marıo Bergolo jasynyń ulǵaıýyna baılanysty tipti jańa Rım Papasy laýazymyna úmitker úzdik bestiktiń qataryna da enbegen bolatyn. Biraq ta 12-14 naýryz aralyǵynda ótken Rım Papasyn saılaıtyn kardınaldar keńesi 4-shi kezeńiniń daýys berý nátıjesinde ol 77 kardınaldyń zor senimine ıe boldy. Jańa Papa Frantsısk I esimin tańdap aldy. Aıta keterligi, Elbasy Nursultan Nazarbaev Rım Papasy Frantsıskti Kıeli Taq Pontıfıgi laýazymyna saılanýyna baılanysty kópultty Qazaqstan halqynyń jáne jeke óz atynan shyn júrekten quttyqtady. «Qazaqstan men Vatıkan arasyndaǵy ózara túsinistik pen senimge negizdelgen qarym-qatynastar 20 jyldan astam ýaqyttan beri damyp keledi. Rım Papasy Ioann Pavel II-niń 2001 jyly Qazaqstanǵa jasaǵan tarıhı sapary - sonyń aıqyn dáleli», - delingen jedelhatta. Sondaı-aq Qazaqstan Prezıdenti Rım Papasy Frantsısktiń qyzmeti eki el arasyndaǵy yntymaqtastyq pen syndarly únqatysýdyń odan ári damýyna jańa serpin beretinine senim bildirdi.

Qazirgi ýaqytta H.Bergolonyń 1936 jyly Býenos-Aıreste ıtalııadan qonys aýdaryp kelgen temir jol jumysshysynyń otbasynda dúnıege kelgendigi belgili. Ol bes balanyń kenjesi bolǵan. Joǵary oqý ornyn bitirip, hımııa tehnıgi dıplomyn aldy. 22 jasynda ıezýıtter ordeni qataryna qosylǵan ol 1969 jyly dinı qyzmetshi bolyp shyǵa keldi. Ol barsha ómirin Argentınadaǵy shirkeýge qyzmet etýge arnady.

Jańa pontıfıktiń bıografııasy, kózqarasy men qundylyǵy sońǵy kúnderdegi jańalyqtardyń basty taqyrybyna aınaldy. Batystyq BAQ-tar onyń barsha ómirin ne úshin shirkeýge qyzmet etkendigine qatysty nusqalardyń birin jazýda. Olardyń taratqan aqparatyna qaraǵanda, H.Bergolo mundaı qadamǵa jaýapsyz mahabbattan keıin barǵan kórinedi. 12 jasar jasóspirim kezinde Býenos-Aıres qalasy mańynda turatyn qyzǵa júrektegi sezimin bildirip, qolyn usynǵan kórinedi. Alaıda qyz ata-anasynyń qarsy bolýy sebebinen onyń usynysyn qabyl almapty. Bul oqıǵany kúni keshe jańa Papanyń sol kezdegi mahabbaty aıtyp bergen. Degenmen, Bergolonyń óz suhbattarynyń birinde mundaı sheshimniń birtindep kelgendigin aıtqanyn eskergen jón.

H.Bergolonyń óz otandastary sııaqty fýtbol men tangonyń jaqsy kóretindigi belgili. Alaıda, ol jas kezinde ókpe ınfektsııasynyń órshýine baılanysty ókpesiniń bir bóligin aldyryp tastaǵan edi. Sondyqtan da oǵan denesine aýyr júk túsirýge bolmaıdy. Jańa pontıfıktiń basty ereksheligi retinde onyń qarapaıymdylyǵy aıtylýda. Ol Býenos-Aıreste ózine tıesili lımýzınnen bas tartyp, jumysqa qoǵamdyq kólikpen qatynap júrgen. Tipti, shirkeýge minájat etýge kelgende de ol kóbine eń sońǵy qatarda otyrǵan.

Iezýıtter ordeniniń ókili Frantsısk I - emdelmeıtin, daýasyz aýrý adamnyń óz erkimen ólimge moıynsunýyna, abort jasatýǵa jáne birjynysty nekege shynaıy qarsylyq tanytýshylardyń biri. Áleýmettik ádildik ıdeıalaryna barynsha berilgen, jahandaný keseli men aqsha ımperıalızmine qarsy. Biraq onyń ómirbaıanyndaǵy keleńsiz kezeńder de jıi aıtylyp júr: 1976-1983 jyldar, ol kezde jas dinı qyzmetshi H.Bergolonyń mansaby órlep, al Argentınany áskerı top basqarǵan. Birqatar argentınalyq qoǵamshyldary ony «las soǵys» kezeńinde áskerı toppen ymyralas boldy, tipti birde áriptesteri týraly sóz tasyp, olar sottalyp ketti degendi de aıtýda. Bul kiná taǵýlardy Vatıkan túbegeıli joqqa shyǵaryp, antıklerıkandyq naýqan dep ataýda.

Qalaı bolǵandada Papa saılandy jáne de álemdik saıasat salasyndaǵy onyń bastamalary qandaı bolatyndyǵy basty másele bolyp otyr. Baıqaýshylar onyń kelýimen barlyq Rım katolık shirkeýlerinde jańartý júrgiziledi dep kútýde. Sońǵy jyldary Vatıkannyń abyroı-bedeline aıtarlyqtaı nuqsan kelip, dinı qyzmetshiler arasyndaǵy para alýshylyq pen kámelettik jasqa tolmaǵandarmen jynystyq qatynasqa túsýi týraly aqparattar taraǵan bolatyn. Endigi ýaqytta osy keleńsizdikterdiń barlyǵyn retteý jańa Frantsısk I-diń moınyna artylady.

Aıta keterligi, jańa Papanyń kelýimen pravoslav shirkeýiniń ókilderi ózara baılanystyń jaqsara túsetindigine zor senim artýda. Islam yntymaqtastyq uıymy da ıslam men hrıstıan arasyndaǵy tarıhı tatýlastyqqa umtylý ymyrasyn kútip, hrıstıan men musylman qarym-qatynasynyń saýyqtyrylýyna ıek artady.

Jańa Rım Papasy Frantsısk I-di taqqa otyrǵyzý rásimi 19 naýryz kúni Vatıkandaǵy áýlıe Petr alańynda ótedi.