Alekseı Vlasov: Jańa Konstıtýtsııa tıimdi memlekettik basqarýǵa negiz bolady
ASTANA. KAZINFORM — Qazaqstannyń jańa Konstıtýtsııasynyń kúshine enýi eldiń tereń saıası jańǵyrý kezeńin bastaıdy. Bul týraly Kazinform agenttiginiń menshikti tilshisine bergen suhbatynda Reseılik Áleýmettik zertteýler saraptamalyq ınstıtýty departamentiniń dırektory Alekseı Vlasov málimdedi.
Onyń aıtýynsha, jańartylǵan Ata zańnyń kúshine enýi Qazaqstannyń qazirgi tarıhyndaǵy eń mańyzdy oqıǵalardyń biri, óıtkeni ol memlekettik basqarý júıesin aýqymdy jańartýǵa negiz qalaıdy.
— Aldaǵy aılarda Qazaqstan mańyzdy ınstıtýtsıonaldyq ózgerister kezeńinen ótedi. Jańa Parlamentke saılaý ótkizilip, Halyq keńesi qurylady, vıtse-prezıdenttiń kandıdatýrasy aıqyndalady. Munyń bári memlekettik bılikti uıymdastyrýdyń jańa modeline kóshýdi bildiredi, — dedi sarapshy.
Alekseı Vlasovtyń pikirinshe, bul tek memlekettik ınstıtýttardyń qurylymdyq ózgeristeri ǵana emes, sonymen qatar aýqymdy kadrlyq jańarýdy da qamtıdy.
— Atqarýshy jáne zań shyǵarýshy bılik quramynda da eleýli ózgerister bolýy ábden múmkin. Jańa basqarýshylardyń kelýi júrgizilip jatqan reformalarǵa qosymsha serpin berip, el basshylyǵy belgilegen mindetterdiń tıimdi júzege asýyna yqpal etedi, — dep atap ótti ol.
Sarapshynyń aıtýynsha, konstıtýtsııalyq reformanyń basty maqsaty — memlekettik basqarýdyń anaǵurlym tıimdi ári ádiletti modelin qalyptastyrý.
— Júrgizilip jatqan barlyq ózgerister Ádiletti Qazaqstandy — ádildik, ashyqtyq jáne azamattar úshin teń múmkindikter qaǵıdattaryna negizdelgen memleketti qurýǵa baǵyttalǵan, — dedi Alekseı Vlasov.
Sonymen qatar sarapshy aýqymdy reformalardy júzege asyrý ýaqyt pen barlyq memlekettik ınstıtýttardyń júıeli jumysyn talap etetinin aıtty.
— Konstıtýtsııalyq normalardy is júzinde júzege asyrý birden júzege asatyn úderis emes ekeni anyq. Degenmen jańa Konstıtýtsııa erejelerin dáıekti túrde iske asyrý qoǵam suranysyna saı keletin zamanaýı memlekettik basqarý júıesin qalyptastyrýǵa múmkindik beredi. Qazaqstan Prezıdenti Qasym-Jomart Toqaev aıqyndaǵan eldi jan-jaqty jańǵyrtý jáne teń múmkindikter memleketin qurý baǵytyn tabysty júzege asyrýda qazaqstandyq áriptesterimizge sáttilik tileımin, — dep túıindedi sarapshy.
