Alekseı Vedev: Jasandy ıntellekt EAEO ekonomıkasynyń ósimin jedeldetýi múmkin
ASTANA. KAZINFORM – Tsıfrlandyrý men jasandy ıntellekt EAEO elderiniń ekonomıkalyq ósiminiń negizgi qozǵaýshy kúshine aınalýy múmkin. Bul týraly Eýrazııalyq ekonomıkalyq komıssııa makroekonomıkalyq saıasat departamentiniń dırektory Alekseı Vedev Jibek Joly arnasyna bergen suhbatynda aıtty.
Onyń aıtýynsha, búginde tsıfrlyq kún tártibi EAEO elderi úshin negizgi basymdyqtardyń birine aınalǵan. Sebebi odaq ekonomıkasyndaǵy jalpy ishki ónimniń shamamen jartysy qyzmet kórsetý salasyna tıesili. Al bul sektor tsıfrlandyrý men jasandy ıntellektini engizýmen tikeleı baılanysty.
— Jasandy ıntellekt pen tsıfrlandyrý ekonomıkalyq ósimniń basty qozǵaýshy kúshine aınalýy múmkin. Sonyń nátıjesinde áleýetti JІÓ ósimi keńeıip, jylyna 4–5 paıyzdyq kórsetkish qoljetpes meje emes, qalypty deńgeı retinde qarastyryla bastady, – dedi Alekseı Vedev.
Onyń aıtýynsha, tsıfrlyq tehnologııalardyń nátıjesi qazir áldeqaıda tez baıqalady.
— Buryn ózgeristi kórý úshin jyldar qajet edi. Qazir nátıje birneshe aıda kórinedi, – dedi ol.
Sarapshy EAEO elderindegi tsıfrlandyrý deńgeıi ártúrli ekenin aıtty. Alaıda Qazaqstan, Reseı jáne Belarýs bilim men matematıka salasyndaǵy áleýetiniń arqasynda aldyńǵy qatarda keledi.
— Jabdyq jaǵynan keıde artta qalýymyz múmkin. Biraq matematıka men bilim berý boıynsha básekege qabilettimiz, – dedi Alekseı Vedev.
Onyń pikirinshe, ıntegratsııalyq alańdar men halyqaralyq forýmdar tehnologııalyq yntymaqtastyqty kúsheıtýge yqpal etedi.
— Integratsııanyń tıimdiligi taýar men qyzmet saýdasynan, eńbek resýrstarynyń qozǵalysynan jáne ǵylymı-tehnıkalyq áriptestikten kórinedi. Mundaı kooperatsııa óte mańyzdy, – dedi ol.
Sondaı-aq ol 2026 jyly EAEO ekonomıkasy úshin negizgi táýekelderdiń biri joǵary ınflıatsııa bolatynyn aıtty. Onyń sózinshe, bul ortalyq bankterdi bazalyq mólsherlemeni kóterýge májbúrleıdi.
— Bul nesıe belsendiligin tómendetip, kásiporyndardyń qarjylyq jaǵdaıyna keri áser etedi. Sonyń saldarynan ınvestıtsııa men ekonomıkalyq ósim baıaýlaıdy, – dedi Alekseı Vedev.
Eýrazııalyq ekonomıkalyq komıssııanyń boljamynsha, Reseı ekonomıkasynyń ósimi bıyl 1 paıyzdan tómen bolýy múmkin. Qazaqstanda da ósim baıaýlap, 6,5 paıyzdan shamamen 4,5 paıyzǵa deıin tómendeýi yqtımal.
— Jalpy, EAEO ekonomıkasy shamamen 1,7 paıyzǵa ósedi dep kútilip otyr. Bul álemdik ortasha kórsetkish — 3,1 paıyzdan tómen, - dedi Eýrazııalyq ekonomıkalyq komıssııa makroekonomıkalyq saıasat departamentiniń dırektory.
Sarapshynyń aıtýynsha, táýekelderdi azaıtý úshin odaq elderi ekonomıkalyq saıasatty ózara úılestirýi qajet. Ásirese tarıftik saıasat, valıýta retteý jáne energetıkalyq daǵdarystarǵa birlesip áreket etý mańyzdy.
— Munaı baǵasynyń ósýi eki túrli áser beredi. Bir jaǵynan eksporttaýshy elder úshin tıimdi. Ekinshi jaǵynan ishki shyǵyndardy ósirip, suranysty tómendetýi múmkin. Sondyqtan bul jerde úılesimdi saıasat qajet, – dep túıindedi Alekseı Vedev.
Aıta keteıik, buǵan deıin Natalıa Pavlova sot salasynda jasandy ıntellektini engizý máselesine qatysty pikir bildirgen edi.
