Alekseı Tsoı: Qazaqstan – medıtsınalyq ınnovatsııalar haby bolýǵa qabiletti
ASTANA. KAZINFORM - Qazaqstan Respýblıkasy Prezıdenti Іs basqarmasy Medıtsınalyq ortalyǵynyń jetekshisi Alekseı Tsoı halyqaralyq Digital Bridge forýmynyń aıasynda ótken «Densaýlyq saqtaý 2030: Qazaqstan ımportqa táýeldilikten medıtsınalyq sheshimderdi eksporttaýǵa qalaı óte alady?» atty paneldik pikirtalasta negizgi spıkerlerdiń biri boldy.
Óz sózinde Alekseı Tsoı elimizde medıtsınalyq týrızmniń damyp kele jatqanyn jáne shetelde moıyndalǵan birqatar ınnovatsııalyq tehnologııalardyń engizilip jatqanyn atap ótti.
«Qazaqstan – ýrannyń basty óndirýshileriniń biri. Memleket basshysy radıofarmatsevtıka salasyn damytýdy strategııalyq basymdyq retinde aıqyndady. Bul bizge joǵary sapaly radıofarmatsevtıkalyq preparattardy eksporttaý múmkindigin beredi», – dedi ol.
Sonymen birge Medortalyq basshysy Qazaqstannyń klınıkalyq zertteýler salasyndaǵy áleýetine toqtaldy.
- Bizdiń medıtsınalyq bazalarymyz JCI men ISO halyqaralyq standarttaryna sáıkes akkredıttelgen. Bul zertteýlerdiń sapasyna kepildik beredi jáne álemniń jetekshi bıotehnologııalyq kompanııalarymen seriktestikke jol ashady, – dedi Alekseı Tsoı.
Spıkerdiń aıtýynsha, elimiz úshin jasandy ıntellektini damytý erekshe mańyzǵa ıe. Qazaqstanda keń kólemdi derekter qory men joǵary deńgeıdegi tsıfrlandyrý bar, bul densaýlyq saqtaý júıesin álemdik startaptarǵa ashyq etedi.
«Mańyzdysy – jańa tehnologııalardy synaqtan ótkize alatyn retteýshi alańdar qurý. Medortalyqta biz medıtsınalyq derekterdi óńdeıtin serverdi iske qosyp, jasandy ıntellekt negizinde dıagnostıka men emdeýdiń ınnovatsııalyq hattamalaryn synaýdy josparlap otyrmyz», – dedi ol.
Osy oraıda Alekseı Tsoı otandyq MIRAI TECH startapynyń mysalyn keltirdi. Kompanııa ázirlegen «aqyldy tabandyqtar» júris-turysty taldap, jasyryn patologııalardy anyqtaýǵa jáne ońaltýdyń tıimdiligin arttyrýǵa kómektesedi. Bul ónim Medortalyq aýrýhanasynda qoldanylyp, Sılıkon alqabyndaǵy Silkroad Innovation Hub akseleratorynyń fınalısteri qataryna endi.
Pikirtalastyń ınteraktıvti bóliminde sarapshylar 2030 jylǵa arnalǵan yqtımal stsenarıılerdi talqylady. Alekseı Tsoı eń ońtaıly sheshim retinde jasandy ıntellekt qoldaýymen onlaın-keńes berýdi atady – bul tehnologııa qoljetimdiligi men dárigerdiń kásibı jaýapkershiligi arasyndaǵy teńgerimdi saqtaıdy.
Sonymen qatar ol jasandy ıntellektini engizýde etıka men ashyqtyq máselelerine toqtaldy:
- Patsıent tsıfrlyq sheshimderdiń dárigerdiń biliktiligin tolyqtyra túsetinine senimdi bolýy tıis. Densaýlyq úshin tek baǵa men jyldamdyq qana emes, sheshimdi kásibı mamannyń qabyldap otyrǵanyna degen senim de mańyzdy. Tek sonda ǵana ınnovatsııalardy qoǵam oń qabyldaıdy, – dedi ol.
Qorytyndylaı kele, Alekseı Tsoı Medortalyqtyń ınvestorlar men ázirleýshiler úshin ashyq ekenin jetkizdi.
«Biz stýdentterdi, startaperlerdi, kompanııalardy qoldaımyz, derekter qoryna qoljetimdilik usynamyz jáne jańa ónimderdiń jasalýyna jaǵdaı jasaımyz. Qazaqstannyń álemdik deńgeıdegi medıtsınalyq ınnovatsııalar ortalyǵyna aınalýǵa barlyq múmkindigi bar», – dep túıindedi Medortalyq basshysy.
Osyǵan deıin Astanada Digital Bridge 2025 halyqaralyq tehnologııalyq forýmy ótip jatqany týraly jazdyq.
Atalmysh jıyndy ashqan prezıdent onyń óte mańyzdy pikir almasý alańyna aınalǵanyn aıtty.