Alekseı Poltoranın klassıkalyq sprıntte júldeli úshinshi oryndy ıelendi
ASTANA. QazAqparat - Germanııanyń Oberstdorf qalashyǵynda shańǵy sportynan ótip jatqan «Týr de Skı» kópkúndik jarysynyń tórtinshi kezeńinde klassıkalyq sprıntte qazaqstandyq Alekseı Poltoranın júldeli úshinshi oryndy jeńip aldy.
Vesti.kz saıtynan alynǵan málimetke qaraǵanda, 1,4 km qashyqtyqta norvegııalyq Emıl Iversen jeńiske jetti. Odan ekinshi oryn alǵan reseılik Sergeı Ýstıýgov 1,03, al qazaqstandyq shańǵyshy 1,40 sekýndqa qalyp qoıdy. Esesine A.Poltoranın ataǵynan at úrketin norvegııalyq Martın Ionsrýd Sýndbıý men Petter Nortýgty, sondaı-aq nemis Sebastıan Aızenlaýer sııaqty myqtylardy artta qaldyrdy.
Eske sala keteıik, «Týr de Skı» jarysynyń Shveıtsarııanyń Lentserhaıde mekeninde ótken ekinshi jáne úshinshi kezeńinde A.Poltoranın besinshi jáne jetinshi oryndy ıelengen bolatyn. Demek, osy joly onyń júldege iligýi zańdylyq. «Týr de Skı» jarysynyń besinshi kezeńi Oberstdorfta, altynshy kezeńi Italııanyń Toblah, jetinshi jáne qorytyndy segizinshi kezeńi Val dı Fıemme (bul da Italııada) mekeninde ótedi. Osy básekelerde de Qazaqstannyń kóshbasshy shańǵyshysy júldege talasa alady.
