Alekseı Poltoranın Álem kýbogynda altynshy orynǵa ıe boldy
ASTANA. QazAqparat - Estonııanyń Otepııa qalasynda ótip jatqan shańǵy sportynan Álem kýbogy kezeńinde qazaqstandyq sportshy Alekseı Poltoranın 15 shaqyrymdyq klassıkalyq ádispen júgirýde altynshy oryndy ıelendi, dep habarlaıdy QazAqparat tilshisi.
Bul synda jerlesterimizden Poltoranınnen ózge Vıtalıı Pıhalo - 44-shi, Oljas Klımın - 50-shi, Denıs Volotka - 53-shi, Evgenıı Velıchko - 56-shy oryndardy ıelendi. Jalpy saıysqa 82 shańǵyshy qatysqan bolatyn.
Bul jarysta bas júldeni Norvegııa sportshysy Martın Ionsrýd Sýndbıý jeńip aldy. Ol ekinshi oryn alǵan Fın Iıvo Nıskanennen 37,1 sekýndqa ozyp ketti. Úzdik úshtikti taǵy bir norvegııalyq Hans Hollýnd tuıyqtady.
Esterińizge sala keteıik, 22 aqpan kúni Fınlıandııanyń Lahtı qalasynda shańǵy sportynan álem chempıonaty ótedi.
