Alekseı Nıdiń ornyna kim keledi

ASTANA. QazAqparat - QR Mádenıet jáne sport mınıstrligine qarasty deneshynyqtyrý jáne sport isteri jónindegi komıtettiń tóraǵasy Elsııar Qanaǵatovtyń aıtýynsha, kelesi aptada aýyr atletıkadan Qazaqstan quramasynyń bas bapkeri taǵaıyndalady, dep xabarlaıdy QazAqparat tilshisi.

"Alekseı Nı óz erkimen aryz jazdy. Ol kisi qyzmetinen ketti. Ázirshe, mindetin atqarýshy (aǵa bapker - avt.)  bar. Endi, jeltoqsannyń 5-i kúni barlyq úmitkerlerdi qarap, naqty sheshim shyǵaratyn bolamyz. Aýyr atletıka federatsııasynyń ókilderi qatysady. Sol jerde bas bapkerdi bekitemiz", - dedi E.Qanaǵatov QazAqparat tilshisine bergen suxbatynda.

"Al bas bapkerlikke saı adam bar ma?" degen suraqqa komıtet basshysy: "Iá, adam bar", - dep qysqa ǵana jaýap berdi.

Aıta keteıik, Alekseı Nı aýyr atletıkadan Qazaqstan quramasyn 1994 jyldan beri jattyqtyryp kelgen. Alaıda sońǵy dopıng daýynan keıin ol óz erkimen ketýge sheshim qabyldady.