Alekseı Nı: Bul naǵyz báseke boldy. S.Podobedova 164 kelini de erkin eńserer edi
ASTANA. 4 tamyz. QazAqparat - Búgin Qazaqstan ulttyq quramasynyń jankúıerleri aýyr atletterimizdiń taǵy bir jarqyn jeńisine kýá boldy,
dep habarlady Astana qalalyq týrızm, dene shynyqtyrý jáne sport basqarmasynyń baspasóz qyzmetinen.
75 kelige deıingi salmaq sanatynda jarys jolyna shyqqan ziltemirshimiz Svetlana Podobedova serpe kóterýde Olımpıada rekordyn jańartýmen qatar, eki saıystyń qorytyndysynda 291 kelilik (130+161) salmaqty baǵyndyryp, Olımpıada chempıony ataǵyn jeńip aldy. Osylaısha ol Qazaqstan ulttyq quramasynyń qorjynyna tórtinshi altyn medaldi saldy.
Sportshymyzdyń osy jeńisine oraı ótkizilgen baspasóz máslıhatyna jınalǵan jattyqtyrýshylardyń da, sportshylardyń da, tilshiler men jankúıerlerdiń de kóńili kóterińki boldy.
«Bul birneshe jyldan bergi eki el arasyndaǵy báseke bolatyn. Reseılikter bizdi taktıkalyq turǵydan eki jaqtan qysym kórsetý úshin sportshylaryn 69 kelide jarys jolyna shyǵarǵan joq. Degenmen, olar bizdiń Anna Nurmuhambetova óner kórsetken salmaq sanatynda jarys jolyna shyqqanynda, koreılik sportshyny erkin jeńer edi. Biraq olar bizge qarsy eki sportshysyn, rekordshysyn shyǵardy. Bizge óte qıyn boldy», - dedi aýyr atletıkadan QR quramasynyń jattyqtyrýshysy Alekseı Nı.
Onyń atap ótýinshe, bastapqyda-aq olar reseılik Nadejda Evstıýhınany jarys jolynan yǵystyrýǵa tyrysqan. «3 tamyz meniń esimde jaqsy saqtaýly. Dál osy kúni Beıjiń olımpıadasynda Svetanyń jarys jolyna shyǵýyna múmkindik bermegen edi. Biz dál sol kezde kelesi oıyndarda osy medaldi alamyz dep ant ishken edik. Egerde sol kezde Svetany jarys jolyna shyǵarǵanda, ol qazirgi ýaqytta óziniń sporttyq mansabyn aıaqtar ma edi, kim bilsin. Degenmen, onyń birbetkeıligi, minezi, ustamdylyǵy arqasynda biz daıyndaldyq», - dedi A.Nı.
Ol sonymen qatar osy oıyndarda bizdiń sportshynyń álem rekordyn jańarta almaǵyndyǵyna ókinish bildiretindigin de jasyrmady. «Ol 164 kelini de kótere alar edi. Degenmen biz saqtanýdy jón kórdik. Alaıda, jańa rekordty Baron Koenge arnar edik, olar osy jerden emes pe edi? Bizdiń qalaı rekord jańartatynymyzdy kórýi úshin», - dedi Svetanyń jattyqtyrýshysy.
Svetlana Podobedovanyń ózi álemdik rekordty jańartý basty maqsaty emes ekendigin moıyndap otyr. Eń bastysy, ol Olımpıada altynyn utyp aldy. «Álemdik rekordty jańartý - mańyzdy emes, eń mańyzdysy - Olımpıadalyq oıyndarda jeńý. Qıyn bolǵany ras, men kóp ýaıymdadym, alaıda óz kúshimniń jetetindigine sendim, óıtkeni daıyndyǵymyz óte jaqsy bolǵanyn birneshe ret aıtqanmyn. Áserimdi qazir aıtyp jetkize almaımyn. Ziltemirdi sońǵy ret kótergende dabyldy da estimedim, ustap turarymdy ne túsirerimdi de bilmedim, tóreshiniń kúlimsirep, bas ızegeninen keıin ǵana túsirdim. Sol kezde ǵana Olımpıada chempıony atanǵanymdy uqtym», - dedi ol.
«Meniń Qazaqstanda turyp, jumys istegenime segiz jyl boldy. Men búgin baqyttymyn. Bul ońaı jeńis bolǵan joq. Olımpıada oıyndaryn Álem chempıonatymen, Azııa oıyndarymen salystyrýǵa kelmeıdi. Biz ár kún saıyn tańerteńgi onnan túngi on ekige deıin úsh márte jattyǵamyz, sondyqtan da bul jeńisti kezdeısoqtyq dep aıtýǵa bolmaıdy. Men Qazaqstanda turǵanyma baqyttymyn, bul meniń ekinshi otanym ári bul eldi men jaqsy kóremin!» - deıdi Qazaqstan ulttyq quramasynyń keńesshisi Enver Týrkelerı.
