Alekseı Lýtsenko: Azıadaǵa tyńǵylyqty daıyndalyp, ózime artylǵan senimdi aqtadym
SINSIRO. KAZINFORM — Qazaqstandyq velosportshy Alekseı Lýtsenko Japonııada ótip jatqan HH jazǵy Azııa oıyndarynda altyn medal jeńip alǵannan keıin Kazinform tilshisine suhbat berip, sol sáttegi qýanyshty sezimimen bólisti.
Otandasymyz búgin kásibı mansabynda jazǵy Azııa oıyndarynyń besinshi altyn júldesin jeńip alǵanyn eske saldy.
— Azııa oıyndarynda Qazaqstannyń atynan shyǵyp, tuǵyrdyń eń bıik satysyna kóterilý men úshin árdaıym erekshe sezim. Búgin tańerteń-aq jaqsy jańalyqpen bastadyq. Rınata altyn medal jeńip aldy. Bul búkil quramamyzǵa úlken serpin berdi. Men de sol jaqsy lepti jalǵastyrýǵa tyrystym. Bul — Azııa oıyndaryndaǵy besinshi altyn medalim, — dedi Alekseı Lýtsenko.
Veloshabandoz jarysqa daıyndyqtyń uzaq ýaqytqa sozylǵanyn aıtyp, jyl basy ózi úshin ońaı bolmaǵanyn atap ótti.
— Jyl basy men úshin asa sátti bolmady. Sportta jeńis te, jeńilis te qatar júredi. Burynǵy kásibı sportshy Dmıtrıı Mýravev maǵan kóp qoldaý kórsetip, jiger berdi. Azıadaǵa tyńǵylyqty daıyndalyp, ózime artylǵan senimdi aqtadym, — dedi sportshy.
Lýtsenko sondaı-aq daıyndyq kezeńinde kórsetken qoldaýy úshin QR týrızim jáne sport mınıstrligine alǵysyn bildirdi.
Qazaqstandyq veloshabandoz alda ótetin toptyq jarysta júlde úshin bar kúshin salatynyn aıtty.
— Bizdiń áli bir múmkindigimiz bar — toptyq jarys. Komandamyz myqty. Sondyqtan úsh kúnnen keıin ótetin jarysta jeńis tuǵyry úshin bar kúshimizdi salamyz, — dedi Alekseı Lýtsenko.
Osyǵan deıin habarlaǵanymyzdaı, Qazaqstan quramasy tasjoldaǵy velosporttan jekeleı synda eki altyn medal jeńip aldy. Rınata Sultanova el qorjynyna alǵashqy altyn, al Alekseı Lýtsenko ekinshi altyn júlde syılady.
Sonymen qatar, Arlan Jańabaı trıatlonan Azııa oıyndarynyń qola júldegeri atandy.
