Alekseı Lýtsenko «Týr Almaty» jeńimpazy ataǵyn qorǵap qaldy
ALMATY. QazAqparat - «Týr Almaty-2017» velojarysy óz máresine jetti, dep habarlaıdy «QazAqparat» HAA tilshisi.
Búgingi kezeńniń jáne qorytyndy nátıjeler boıynsha jalpy jarystyń jeńimpazdary anyqtaldy.
Ekinshi kezeń 160,5 kılometrlik taý joly boldy. Jarys «Halyq Arenadan» bastaldy. Veloshabandozdar Almaty shyǵys aınalma avtojoly jáne ál-Farabı dańǵylymen Tuńǵysh Prezıdent parkine deıin jáne keri baǵytta birneshe ret júrip, artynsha «Medeýge» qaraı jol tartty. Jazyqtyqtaǵy jarystarda jyldamdyq óte joǵary bolyp, lıderler men pelatonnyń arasynda úlken úzilister bolyp jatty.
«Medeýge» qaraı bet túzegen tusta úzdikter qara úzip shyqty. Jalpy eseptiń lıderleri qataryna kirgen 5 sportshy: «Astana» komandasynyń qazaqstandyq múshesi Alekseı Lýtsenko, frantsýz Remı Dı Gregorıo, sondaı-aq taýǵa kóterilý jarystaryna mamandanǵan sportshylardan quralǵan shaǵyn top alǵa ozdy.
Olardyń ishinde 2016 jylǵy Olımpıadanyń kúmis medal ıegeri, negizgi mamandyǵy kenshi, «Astana» komandasynyń múshesi danııalyq ıAkob Fýlsang «Medeýdegi» máre syzyǵyn 3 saǵat 58 mınýt jáne 2 sekýnd nátıjesimen birinshi qıyp ótip, kózge tústi.
Ekinshi oryndy alǵan qazaqstandyq Alekseı Lýtsenko jeńimpazdan 12 sekýnd kesh qaldy.
Úshinshi bolyp márege shveıtsarııalyq Kolın Krıs Shtıýssı keldi. Osy kezeńniń úzdik ondyǵyna qazaqstandyq 4 sportshy - Evgenıı Gıdıch (6-oryn), Baqtııar Qojataev, ıÝrıı Natarov jáne Matveı Nıkıtınder kirdi. Alǵashqy ekeýi Pro Team «Astana» komandasynyń sapynda óner kórsetse, qalǵan ekeýi - Qazaqstan quramasynyń múshesi.
Qorytyndy esepte birinshi kezeńdegi nátıjesine baılanysty birinshi oryndy byltyrǵy «Týr Almaty» jeńimpazy Alekseı Lýtsenko aldy.
Erekshe atap ótetin jaıt, burynǵysynsha Halyqaralyq velosıpedshiler odaǵy (UCI) aıasynda ótetin jarysqa 2.1 klasy berilip, ol eki kúndik jarysqa aınaldyrylǵan. Jalpy esepte «Astana» komandasy absolıýttik birinshi oryndy ıelendi.
