Alekseı Lodochnıkov: Abaıdyń sózi uranyma aınaldy

Alekseı Ertis boıyndaǵy qalyń qazaqtyń arasynda, Pavlodar oblysy Tereńkól aýdanyndaǵy balalar úıinde ósken jigit. Júregi «qazaǵym» dep soǵady. Halqymyzdyń án-kúıin dombyramen oınaýy da bir bólek. 

Ol 6 jasqa tolǵanda ustazdarynyń keńesimen daryndy balalarǵa arnalǵan mýzykalyq mektepke oqýǵa túsip, «Dástúrli án jáne dombyrada oınaý» mamandyǵyn ıgerip shyqty. Búginde Alekseı Instagram men TikTok jelilerinde tanymal blogerge aınalǵan.

— Qazaq rýhanııatyna, mentalıtetine jaqyn bolýymnyń sebebi balalar úıinde qazaq tobynda tárbıelendim. Ortamnyń barlyǵy qazaqsha sóılemese de, qazaq apaılarymnyń paıdasy tıgen bolar dep oılaımyn. Qazaqy tárbıeniń nátıjesi bolar, eseıe kele aralasatyn joldastarymnyń barlyǵy qazaq boldy. Dombyra úıretken alǵashqy ustazym Ashat Erkebulanov, odan keıin jol kórsetken Medǵat Manapov, Amangeldi Qojanov, Janbolat Baısoltan sııaqty aǵalaryma alǵysym sheksiz. Meni shetsiz-sheksiz qazaq án-kúı ónerine jeteledi. Maǵan dombyramen án aıtý bala kezimnen erekshe unaıtyn, bul ónerimdi áli kúnge jetildirýmen kelemin, — deıdi bloger. 

Ol búginde ýaqytynyń kóp bóligin elimizdegi balalar úılerinde tárbıelenip jatqan jetkinshekterdiń shyǵarmashylyǵyn damytýǵa arnap keledi. Byltyr «Juldyz bolǵym keledi» atty respýblıkalyq jobany qolǵa aldy. Bul balalar úılerindegi jas talanttarǵa arnalǵan.

Ótken jyly alǵash ret vokal óneri boıynsha baıqaý ótip, Astanada bolǵan fınaldyq kezeńge elimizdiń ár túpkirinen 40 bala jınaldy. Jeńimpazdar men júldegerlerge Dýbaı qalasyna joldama, qymbat uıaly telefondar men makbýkter syıǵa tartyldy. Jetkinshekterdiń qandaı áserli sezimde bolǵanyn aıtyp jetkizýge kelmes.

Alǵashqy saıys nátıjeli ótkenin baıqaǵan Alekseı bıyl horeografııa baǵytyndaǵy jas órenderdi synap kórmekke bel býdy. Onyń fınalynda elordaǵa 100-den astam bala jınalady dep kútilip otyr. 

— Qazaq tilin jetik meńgergenim ózim úshin, biraq ony jeleý etip qyzmet surap kórgen emespin. Otanymyzǵa paıdamyz tısin desek, ony ispen dáleldeýimiz kerek. Sózdiń shyny kerek, keıde keıbir qazaq azamattarynyń óz ana tilin bilmeıtinin kórgende, janym ashıdy. Bul kemshilik emes, ósken ortasy sondaı. Biraq ynta bolsa, barlyǵyn lezde úırenýge bolady dep oılaımyn. Al óziń ósip-ónip otyrǵan memlekettiń ana tiline qurmet kórsetý — ortaq mindetimiz! Shetten kelip, elimizdiń keregesin keńeıtip jatqandarǵa qatysty da solaı aıtar edim. Memlekettik tildi bilý — árbir azamattyń paryzy, — dep jalǵady sózin.

Qazirgi ýaqytta Alekseı áleýmettik jelidegi blogyn kúndelikti júrgizedi. Bir ǵana Instagram paraqshasynda 370 myńnan astam oqyrmany bar. Kúndelikti túsiretin rolıkteriniń deni ázil-ospaqqa arnalǵanymen, qoǵamdaǵy keıbir ótkir máselelerdi kórsetýge tyrysady.

— Abaı atamyzdyń «Ózińe sen, ózińdi alyp shyǵar, aqylyń men qaıratyń eki jaqtap» degen dana sózi bar. Bul meniń ómirdegi basty uranyma aınaldy. Kúndelikti ómirde de, jelide de qarapaıym bolýǵa tyrysamyn. Keıbir adamdar meniń rolıkterimdi ata-ájeler jıi kóretinin aıtady. Men úshin bul — maqtanysh. Sebebi olar arqyly nemereleri de tamashalaıdy degen sóz. Al úlkenderdi syılaý, qurmet kórsetýdiń ne ekenin jaqsy bilemin. Bul — men úshin ómirlik mektep, — dep támamdady sózin.

Osylaısha Ertis boıynda jetilgen sary bala búginde Astana qalasynda jemisti eńbek etip júr. Alekseıdiń oıǵa alǵan bastamalary sátimen órile bersin dep tileımiz. 

Buǵan deıin Instagram-daǵy bir vıdeo pavlodarlyq jetim qyzdyń taǵdyryn qalaı ózgertkeni týraly jazǵanbyz.