Alekseı Tsoı: Vaktsınalaý jumystary bekitilgen tártip boıynsha júrgizilýde
NUR-SULTAN. QazAqparat – QR Densaýlyq saqtaý mınıstrligi vaktsınalaýdy uıymdastyrý jáne júrgizý boıynsha ádistemelik usynymdar men vaktsınalardy saqtaý jáne tasymaldaý reglamentin bekitti. Bul týraly vedomstvo basshysy Alekseı Tsoı aıtty, dep habarlaıdy QazAqparat tilshisi.
«Azamattardy koronavırýs ınfektsııasyna qarsy vaktsınalaýdy uıymdastyrý jáne júrgizý jónindegi is-sharalar josparyna sáıkes, mınıstrlik barlyq sharalardy qabyldady jáne 1 aqpannan bastap COVID-19-ǵa qarsy vaktsınalaýdy bastady. Jospar sheńberinde vaktsınalaýdy uıymdastyrý jáne júrgizý jónindegi ádistemelik usynymdar jáne vaktsınalardy saqtaý men tasymaldaý reglamenti ázirlendi jáne bekitildi. Jumystar kestege sáıkes júrgizilýde», - dedi Alekseı Tsoı Úkimet otyrysynda.
Ol vaktsına alǵandar týraly derekterdiń Densaýlyq saqtaý mınıstrliginiń aqparattyq júıesine engiziletinin atap ótti.
«Qazaqstandyq mobıldik qosymshaǵa jeke ımmýndyq mártebesi týraly QR-kodtardy engizý úshin Egovmobile mobıldik qosymshasyn iske qosý josparlanǵan, ol «Ashyq» medıtsınalyq qosymshasymen ıntegratsııalanatyn bolady. Onda medıtsınalyq aqparattyq júıelerdegi azamattar boıynsha, onyń ishinde QR-kod arqyly tekserýge usyný úshin COVID-19 qarsy vaktsınalaýdan ótkeni týraly derekter jınaqtalady», - dedi mınıstr.
Aıta keteıik, 1 aqpanda Qazaqstanda koronavırýs ınfektsııasyn juqtyrý jáne taratý táýekeli joǵary sanattardy koronavırýsqa qarsy vaktsınalaý bastaldy.