Alekseı Tsoı sáýirde óńirlerge qansha vaktsına jetkiziletindigin aıtty
NUR-SULTAN. QazAqparat – Osy aıda elimizge koronavırýsqa qarsy vaktsınanyń 2 mln dozasy jetkiziledi. Bul týraly búgin Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.
«Osy jyldyń 1 aqpanynan KVI-ge qarsy vaktsınatsııa naýqany jalǵasyp jatyr. 1 sáýirden vaktsınatsııalaýǵa jatatyn tulǵalar sanaty keńeıtildi. Kesteni jergilikti atqarýshy organdar ázirleıdi. Búginde birinshi komponent 197 706, ekinshi komponent 72 110 azamatqa salyndy. Respýblıka boıynsha 1 myń turǵynǵa shaqqandaǵy kórsetkish 10,3-ti quraıdy», - dedi Alekseı Tsoı.
Onyń atap ótýinshe, Memleket basshysynyń tapsyrmasyn oryndaý úshin sáýirde vaktsınanyń 2 mln dozasy jetkiziletindigi kútiledi. Bul vaktsınatsııalaýǵa jatatyn turǵyndardyń 23,4 paıyzyn qamtýǵa múmkindik beredi.
«Immýndaý josparyna sáıkes, óńirlerge vaktsına jetkizý kólemi men aldyn ala merzimi aıqyndalǵan. Qazirgi epıdemıologııalyq ahýaldy eskere otyryp, sáýirde vaktsına jetizý kólemi Nur-Sultan (284 myń), Almaty (464 myń), Shymkent (172 myń) qalalaryna, Almaty (232 myń) jáne Qaraǵandy oblystaryna (217 myń) ulǵaıtyldy», - dedi Alekseı Tsoı.
