Alekseı Tsoı Prezıdenttiń «SQ-Farmatsııaǵa» qatysty tapsyrmasy qalaı oryndalǵany jóninde baıandady

NUR-SULTAN. QazAqparat – Úkimettiń keńeıtilgen otyrysynda Memleket basshysy Qasym-Jomart Toqaev Densaýlyq saqtaý mınıstri Alekseı Tsoıdan «SQ-Farmatsııa» kompanııasynyń mindettemelerin qaıta qaraý jónindegi tapsyrmasy qalaı oryndalyp jatqanyn surady, dep habarlaıdy QazAqparat tilshisi.

«SQ-Farmatsııa» kompanııasynyń qandaı syn aıtylǵanyn bilesizder. Ol jerge salmaqty reforma kerek. Osyǵan baılanysty ne isteldi?» - dedi Prezıdent.

Bul suraqqa jaýap bergen Densaýlyq saqtaý mınıstri kompanııanyń jemqorlyq táýekelderine ishki taldaý jumystary júrgizilgenin málim etti.

«Qazirgi ýaqytta sizdiń tapsyrmańyzdy oryndaýdyń naqty jospary qurylǵan. Ol Sybaılas jemqorlyqqa qarsy is-qımyl agenttiginiń baqylaýynda. Biz qoǵamdyq jumys tobyn qurdyq. 23 adamnan turatyn jumys tobyna azamattyq qoǵamnyń, qaýymdastyqtardyń ókilderi men depýtattar kirdi. Bizdiń baqylaýshy onyń quramyna qoǵam ókilderin de engizdi. Bul rette dári-dármekti saqtaý men tasymaldaý jumysynyń elektrondy satyp alý tártibine kóshkenin óte mańyzdy másele dep aıtar edim. Bıyl dári-dármekti satyp alý sharýasyn tolyǵymen avtomattanryýdy kózdep otyrmyz. Osynyń arqasynda ótken jyldan qaraǵanda birshama qarajatty únemdeı alamyz», - dedi ol.