Alekseı Tsoı: MSAK jumysyn jandandyrý kerek
Onyń atap ótýinshe, jyl basynan beri jaǵdaıy aýyr naýqastar sanynyń jekelegen óńirlerde artýyna baılanysty Densaýlyq saqtaý mınıstrligi ókilderi óńirlerge shyǵyp ádistemelik kómek kórsetken. Jumys saparlary barysynda birqatar kemshilikter anyqtalǵan.
«Medıtsınalyq-sanıtarlyq alǵashqy kómek deńgeıinde dıspanserlik toptaǵy patsıentterdi qarqyndy baqylaýǵa alý men janama aýrýlaryn emdeýde kemshilikter bar. Halyq arasynda koronavırýs ınfektsııasynyń aldyn alý jáne dıagnostıkalaý is-sharalary boıynsha aqparattyq túsindirý jumystary álsiz júrgizilgen. Infektsııalyq statsıonarlar deńgeıinde kadrlyq qamtamasyz etýge qatysty da problemalyq máseleler bar. Osyǵan oraı óńirlerge MSAK-statsonarlary, sonymen qatar densaýlyq saqtaý basqarmalary deńgeıind qajetti is-sharalardy uıymdastyrý jóninde egjeı-tegjeıli usynym berildi», - dedi mınıstr.
Sonymen qatar ol óńirlerdi MSAK jáne statsıonarlar deńgeıinde koronavırýspen aýyrǵan naýqastarǵa medıtsınalyq kómek kórsetý barysyn turaqty baqylaýǵa alýǵa shaqyrdy.
«Qazirgi ýaqytta MSAK deńgeıindegi jumystardyń kemshiligi ınfektsııalyq statsıonarlardyń tolyp ketýine, halyqqa shuǵyl jáne jospary medıtsınalyq kómek qoljetimdiliginiń tómendeýine alyp kelýi múmkin. Osyǵan oraı Densaýlyq saqtaý basqarmalary MSAK jumysyn jandandyrýy, koronavırýs ınfektsııasyn juqtyrǵan naýqastardy ambýlatorlyq emdeýge turaqty monıtorıngti qamtamasyz etýi, shaqyrtýlarǵa der kezinde qyzmet kórsetý jáne patsıentterge keńes berý bóliginde mobıldi brıgadalardyń jumysyn únemi baqylaýǵa alýy, PTR-ǵa arnalǵan bıologııalyq materıaldar úlgilerin alýy, koronavırýspen jáne ókpe qabynýymen aýyrǵan naýqastarǵa úılerine dárilik zattardy jetkizip berý, aqparatty túsindirý jumystaryn kúsheıtýi qajet», - dedi Alekseı Tsoı.
