Alekseı Tsoı kóshede maska taǵý halyqqa nelikten mindettelip otyrǵanyn túsindirdi
«Qazirgi tańda Qazaqstanda koronavırýs ınfektsııasyn juqtyrý jaǵdaıy táýligine 1500-1600 adam deńgeıinde turaqtalyp qaldy. Máselen Nur-Sultanda jedel járdemge júginý 22 maýsymnan 30 shilde aralyǵynda úshten ekige azaıdy. Sonymen birge koronavırýs ınfektsııasy boıynsha shaqyrtýlar táýligine 500-den 86-ǵa deıin tómendedi. Sol sekildi jedel járdemdi shaqyrý jaǵdaıy 3 myńnan 1 myńǵa deıin tústi. Statsıonarlardyń tolymdylyǵy 96 paıyzdan 35,7 paıyzǵa deıin azaıdy», - dedi Alekseı Tsoı OKQ-da ótken baspasóz máslıhatynda.
Mınıstr sonymen qatar Shymkent qalasynda da jedel járdem qyzmetin shaqyrý deńgeıi 43 paıyzǵa kemigenin aıtyp ótti.
«Búkil Qazaqstan boıynsha provızorlyq statsıonarlar da jabylýda. Burynǵy, ıaǵnı qalypty jumys tártibine oralyp jatyr. Olar qazir rezervte. Tósek oryndary boıynsha qosymsha qajettilik týyndaǵan jaǵdaıda olar qosymsha jasaqtalady», - dedi ol.
Alekseı Tsoı karantın taǵy eki aptaǵa sozylatyndyqtan búkil el bolyp, kásip ıeleri bolyp qalypty ómirge qaıtý úshin daıyndyq jumystary júrgizilýi kerektigin jetkizdi.
«Densaýlyq saqtaý mınıstrligi koronavırýs ınfektsııasynyń taralý qaýpin eskertý úshin halyqtyń karantın talaptaryn saqtaýyna qatysty birqatar uıymdastyrýshylyq jáne quqyqtyq sharalar qabyldandy. Densaýlyq saqtaý mınıstrligi jaýapty organdarmen birge azamattardy karantın sharalaryn saqtamaǵan jaǵdaıda ákimshilik jaýapkershilikke tartý tártibin bekitti. Bul rette maskany taǵyp júrý – KVI-di juqtyrý qaýpin 30 paıyzǵa azaıtady. Osy jaıdy eskere otyryp, 2020 jyldyń 30 shildesinen bastap Densaýlyq saqtaý mınıstrligi buıryq shyǵardy. Oǵan sáıkes azamattar qoǵamdyq orynda, kóshede maska taǵyp júrýge mindetteledi», - dedi ol.
Sondaı-aq Alekseı Tsoı búgingi kúni AQSh-tyń 43 shtatynda, Polshada, Avstralııada, Slovakııa men Vetnamda qoǵamdyq orynda maska taǵý mindetti ekendigin jetkizdi.
Eske sala ketsek, Qazaqstannyń memlekettik bas sanıtarlyq dárigeri Aıjan Esmaǵambetovanyń qaýlysy boıynsha halyqqa Qazaqstanda kóshede mindetti túrde maska taǵyp júrý mindettelgen bolatyn.