Alekseı Tsoı koronavırýstan óz betinshe emdelmeýge shaqyrdy
Ortalyq kommýnıkatsııalar qyzmetinde ótken brıfıng barysynda BAQ ókili mınıstrge: «Densaýlyq saqtaý mınıstrliginiń ózin-ózi emdeýge qatysty ustanymy qandaı? Qazir WhatsApp chattarynda Lıanhýa Tsınven kapsýlasy syndy qytaı dárisine qatysty aqparat tarap júr. Atalǵan dáriniń resmı satylatyndyǵyna da kúmán bar. Atalǵan kapsýla men ózge de qytaı dárileri dári-dármek tizilimine jáne emdeý hattamasyna kire me?», - dep suraǵan edi.
«Biz azamattarǵa ózin-ózi emdeýmen múldem aınalyspaýǵa keńes beremiz. Óıtkeni, aýrýlardyń barlyǵy birdeı birden baıqala bermeıdi. Keıbir aýrýlardyń, onyń ishinde koronavırýs ınfektsııasynyń da qatparlanýy jıi baıqalady. Dárilik zatty taǵaıyndaý týraly sheshimdi dáriger ǵana qabyldaýy tıis ekendigin túsiný óte mańyzdy», - dep jaýap berdi Alekseı Tsoı.
Sonymen qatar Densaýlyq saqtaý mınıstri Lıanhýa Tsınven kapsýlasy bıologııalyq belsendi qospa ekendigin, onyń elimizde tirkelýine qatysty málimet alý úshin tıisti vedomstvoǵa habarlasý qajettigin aıtty.
«Eger preparat Qazaqstanda tirkelmese, onda respýblıka aýmaǵynda taratýǵa ruqsat joq. Mundaı jańa zattar kóbine bıologııalyq belsendi qospa retinde tirkeledi jáne emdeýdiń klınıkalyq standartyna kirmeıdi», - dedi ol.