Alekseı Tsoı koronavırýspen kúrestiń negizgi qadamdaryn tanystyrdy

NUR-SULTAN. QazAqparat – QR Densaýlyq saqtaý mınıstri Alekseı Tsoı Memleket basshysy Qasym-Jomart Toqaevqa koronavırýs ınfektsııasymen kúrestiń qadamdaryn tanystyrdy, dep habarlaıdy QazAqparat tilshisi.

Onyń sózine qaraǵanda, mınıstrlik tarapynan turǵyndar tap bolǵan negizgi problemaǵa taldaý jasalýda.

«Halyq pen medıtsınalyq qoǵamdastyqtyń alańdaýshylyǵy pandemııanyń aıaqtalýy merziminiń aıqyndalmaýymen baılanysty. Sonymen qatar, qazirgi kezde emdeý men profılaktıkanyń tıimdi ádisteriniń bolmaýy da kópshilikti alańdatyp otyr», - dedi A. Tsoı koronavırýs indetiniń taralýyna qarsy kúres sharalary jónindegi keńeste.

Osy oraıda júrgizilgen taldaý negizinde mınıstrlik halyqtyń suranysyna áreket etý boıynsha asa mańyzdy 10 sharany pysyqtady.

A. Tsoı osy negizgi qadamdardy tanystyrdy:

1. Ambýlatorlyq deńgeıde ınfektsııany emdeý týraly qarapaıym ári túsinikti eskertpeler daıarlaý;

2. Dárilik zattardy jetkizý men satyp alý rásimderin jyldamdatý. Otandyq taýar óndirýshilerdi yntalandyrý;

3. COVID-19-dy dıagnostıkalaýda tsıfrlyq rentgen-apparattardy paıdalanýdy keńeıtý jolymen tekserý sharalarynyń qoljetimdigin arttyrý;

4.Testileý úshin zerthanalar qýatyn kúsheıtý, testilerdi ýaqytyly jetkizý;

5. Shaqyrtýlar kezinde mobıldik brıgadalarmen testilerdi alýdy uıymdastyrý;

6. Úıde patsıentter úshin barynsha qaýipsiz medıtsınalyq kómek kórsetý;

7. Ambýlatorlyq deńgeıde konsýltatsııalardy qashyqtan júrgizýdi engizý;

8. Statsıonarlardy ókpeni jasandy jeldetý apparattarymen jabdyqtaý;

9. Jerleý tártibin ózgertý;

10. Azamatttardyń epıdemıologııalyq saqtyǵyn joǵarylatý.

«Qoǵamdyq deńgeıde áleýmettik jáne jumys isteý tártibin beıimdeý, korporatıvtik jaýapkershilikti arttyrý, aqparattyq tehnologııalar áleýetin júzege asyrý tetikteri engiziledi», - dedi mınıstr.

Budan buryn habarlanǵandaı, 29 maýsym kúni Memleket basshysy Qasym-Jomart Toqaev koronavırýs indetiniń taralýyna qarsy kúres sharalary jónindegi keńeske qatysty .