Alekseı Tsoı koronavırýsqa qarsy vaktsınany ektirýge daıyn - Baǵdat Qojahmetov
Ortalyq kommýnıkatsııalar qyzmetindegi baspasóz máslıhatynda «koronavırýsqa qarsy daıyndalyp jatqan Qazaqstandaǵy vaktsınanyń klınıkalyq synaǵyna Densaýlyq saqtaý mınıstrliginiń sheneýnikteri qatysyp jatyr ma? Vaktsınalaý kezinde mınıstr Alekseı Tsoı ózine ekpe saldyra ma?» degen saýaldar qoıyldy.
Óz kezeginde B. Qojahmetov osy máseleni mınıstrmen talqylaǵanyn atap ótti.
«Vaktsınanyń daıyn bolýy úshin tıisti merzimdi kútý kerek, jarty jyldan kem emes. Vaktsına barlyq halyqaralyq sertıfıkattaýdan ótkennen keıin, mınıstr ekpeni qabyldaýǵa daıyn ekenin aıtty. Ol densaýlyq saqtaý júıesiniń qyzmetkeri bolǵandyqtan, ekpeni aqysyz túrde alady. Densaýlyq saqtaý júıesiniń qyzmetkerleri 200 myńnan astam, olar táýekel tobyna enip otyr», - dedi resmı ókil.
«Al onyń (mınıstrdiń) otbasyna jáne kez kelgen medıtsına qyzmetkeriniń otbasy músheleri vaktsınany óziniń qarjysyna satyp alady», - dedi ol.