Alekseı Tsoı qazaqstandyqtardy taǵy da vaktsına alýǵa shaqyrdy

NUR-SULTAN. QazAqparat – Elimizde 7,1 mln-nan astam adam vaktsınanyń 1-komponentin aldy. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Halyqty vaktsınatsııalaý jalǵasyp jatyr. Búginde 1-komponentpen 7,1 mln-nan astam ekpe aldy. Bul ekpemen qamtylýy tıis halyqtyń 71,5 paıyzyn quraıdy. 2-komponent 5,9 mln-nan astam adamǵa salynyp, qamtý kórsetkishi 60 paıyzǵa jýyqtady. Óńirler vaktsınanyń jetkilikti kólemimen qamtamasyz etilgen. Vaktsına jetkizý kestege sáıkes júrgizilip jatyr», - dedi ol.

Mınıstr vaktsınatsııa koronavırýs ınfektsııasynyń aldyn alýdyń bir ǵana joly ekendigin basa aıtty.

«Sondyqtan qazaqstandyqtardy vaktsına alýǵa jáne elimizde ujymdyq ımmýnıtettiń qalyptasýyna óz úlesin qosýǵa shaqyramyn»,- dedi Alekseı Tsoı.