Alekseı Tsoı qatań karantın qandaı jaǵdaıda engiziletinin aıtty

NUR-SULTAN. QazAqparat - QR Densaýlyq saqtaý mınıstri Alekseı Tsoı qaýipsizdik talaptary saqtalmasa, aldaǵy ýaqytta karantındik sharalar engizilýi múmkin ekenin aıtty, dep habarlaıdy QazAqparat tilshisi.

«Árıne, buǵan deıin bolǵan karantınnen sabaq alýymyz kerek. Osy oraıda, densaýlyq saqtaý júıesin tıisti daıyndyqtan ótkizdik, ıaǵnı aýrýhanadaǵy oryndar men dári-dármek, jabdyqtar jáne basqa da qajetti zattar tolyqtyryldy. Eń myńyzdysy – ol ár adam qaýipsizdik erejesi men áleýmettik qashyqtyqty saqtaýy kerek», - dep toqtaldy mınıstr Ortalyq kommýnıkatsııalar qyzmetinde.

Bul rette A.Tsoı turǵyndar qoǵamdyq oryndarda tıisti qaýipsizdik talaptaryn oryndamaı jatqanyn atap ótti.

«Quqyq qorǵaý organdary bizdiń aýmaqtyq departamentterimizben birlese osy baǵytta qajetti sharalardy qabyldaýda. Ókinishke qaraı, aıyppuldar da salynýda. Aı saıyn aıyppul sany artyp keledi. Bul, óz kezeginde bizde rejımniń oryndalmaı turǵanyn baıqatady. Elimizdegi jaǵdaı turaqty. Degenmen, tıisti talaptardy oryndamasaq, karantın engizilýi múmkin. Atap aıtqanda, indetke tosqaýyl qoıý ózimizge baılanysty. Sondyqtan barlyǵyn oryndasaq, karatın engizilmeýi yqtımal. Alaıda, ereje saqtalmasa, onda karantındik sharalardy engizýge keńes berýge májbúr bolamyz», - dedi Densaýlyq saqtaý mınıstri.