Alekseı Tsoı epıdemıologııalyq ahýaldy turaqtandyrý joldaryn atady

NUR-SULTAN. QazAqparat – QR Densaýlyq saqtaý mınıstri Alekseı Tsoı elimizde epıdemıologııalyq ahýaldy turaqtandyrý joldaryn atady, dep habarlaıdy QazAqparat tilshisi.

«Respýblıkadaǵy epıdemıologııalyq ahýaldy odan ary turaqtandyrýdy qamtamasyz etý jáne koronavırýs ınfektsııasyna shaldyǵý ári ólim-jitim ósimine jol bermeý maqsatynda «qyzyl» jáne «qoıý qyzyl» aımaqtarda turǵan óńirlerde demalys kúnderi lokdaýn saqtaý, monıtorıngi toptarynyń jumysyn kúsheıtý, vaktsınalaýǵa jatatyn halyqty vaktsınamen qamtýdy arttyrý, halyq arasynda aqparattyq túsindirý jumystaryn kúsheıtý, kásipkerlerdiń ótinimderin eskere otyryp, «Ashyq» jobasynyń kóshbasshylary úshin krıterıılerdi sońyna deıin aıaqtaý usynylady», - dedi Alekseı Tsoı búgin Úkimet otyrysynda.