Alekseı Tsoı densaýlyq saqtaý uıymdaryndaǵy servısti jaqsartýǵa ýáde berdi

NUR-SULTAN. QazAqparat - Búgin halyq aldynda esep berý kezdesýinde QR Densaýlyq saqtaý mınıstri Alekseı Tsoı salada josparlanǵan qadamdardy jarııalady, dep habarlaıdy QazAqparat tilshisi.

«Densaýlyq saqtaý salasynda qajetti qaıta qurý vektoryn aıqyndaý úshin biz densaýlyq saqtaý júıesiniń odan ári damý perspektıvalarynyń paıymyn qalyptastyrdyq. Olar densaýlyq saqtaý tıimdiligin arttyrýǵa, medıtsınalyq kómektiń qoljetimdiligi men sapasyn qamtamasyz etýge baǵyttalatyn bolady. Usynylǵan modelde biz patsıenttiń qajettilikterine basty basymdyq berýdi josparlap otyrmyz», - dedi mınıstr.

Onyń aıtýynsha, osy qajettilik negizinde densaýlyq saqtaý uıymdaryndaǵy servısti jaqsartý, medıtsınalyq uıymdardy qajettilikke sáıkes kadrlyq qamtamasyz etý, densaýlyq saqtaýdaǵy protsesterdi avtomattandyrý jáne aqparattandyrý bóliginde jedel sheshimder qabyldanýy tıis.

«Sondaı-aq densaýlyq saqtaý salasyndaǵy qajetti standarttardy, normatıvtik quqyqtyq aktilerdi ázirleý, eń aldymen, halyqtyń qajettiligine qaraı qalyptastyrylatyn bolady. Medıtsınalyq kómektiń qoljetimdiligin qamtamasyz etý jáne sapasyn arttyrý úshin medıtsınalyq uıymdardy materıaldyq-tehnıkalyq qamtamasyz etý, densaýlyq saqtaýdyń jańa obektilerin salý nemese tozǵan obektilerdi jóndeý boıynsha sharalar qabyldanatyn bolady», - ded A. Tsoı.

Nátıjesinde densaýlyq saqtaý júıesi mynadaı baǵyttar boıynsha jetildiriletin bolady:

1. Aýylǵa basymdyq bere otyryp, medıtsınalyq kómektiń qoljetimdiligin arttyrý.

2. Medıtsınalyq-sanıtarııalyq alǵashqy kómekti odan ári kúsheıtý.

3. Medıtsına qyzmetkerleri quzyretteriniń ósýin yntalandyrý.

4. Halyq únine qulaq asatyn densaýlyq saqtaý.

5. Patsıenttiń dárilik jáne bıologııalyq qaýipsizdigi.