Alekseı Tsoı densaýlyq saqtaý salasyndaǵy problemalardy atady
«Densaýlyq saqtaý salasynda kóptegen máseleler bar, olarǵa nazar aýdarý qajet. Salanyń birqatar mańyzdy kórsetkishteri tómendedi. Bul eń aldymen ana ólimine qatysty. Sondaı-aq, júrek-qantamyr júıesi aýrýlarynan bolatyn ólim-jitimniń 15 paıyzǵa óskeni baıqaldy. Munyń bári koronavırýstyq ınfektsııanyń pandemııasymen baılanysty», - dedi mınıstr Ortalyq kommýnıkatsııalar qyzmetinde.
Onyń aıtýynsha, osy problemalardy sheshý úshin buryn-sońdy bolmaǵan sharalar qabyldandy. Qysqa merzim ishinde azamattardyń densaýlyǵyn saqtaýǵa baǵyttalǵan aıtarlyqtaı kúshter men qarajat jumyldyryldy.
«Qazirgi ýaqytta densaýlyq saqtaý júıesi úshin negizgi basymdyq alǵashqy medıtsınalyq-sanıtarııalyq kómektiń qoljetimdiligi men sapasyn qamtamasyz etý bolyp sanalady.
Búgingi tańda halyqqa medıtsınalyq qyzmetterdi 7 myńnan astam ambýlatorııalyq-emhanalyq uıym kórsetedi, onyń ishinde memlekettik 59%, jeke menshik - 41%. Ýchaskelik dárigerdiń júktemesin azaıtý úshin biz 2020 jyly qosymsha jalpy praktıka dárigerleriniń 480 ýchaskesin ashtyq. Medıtsınalyq kómektiń qoljetimdiligin qamtamasyz etý maqsatynda el óńirlerinde 63 ambýlatorııalyq-emhanalyq nysan salynyp, paıdalanýǵa berildi. Medıtsınalyq-sanıtarııalyq alǵashqy kómekti qarjylandyrý ótken jyly densaýlyq saqtaýdy qarjylandyrýdyń jalpy kóleminiń 52,4%-yna deıin jetkizildi. Bul rette, dárilik zattarǵa jazyp berilgen jeńildikti retseptiler sany 13,7 mıllıonǵa jetti», - dedi A. Tsoı.
Sondaı-aq, el halqy skrınıngtik zertteýlermen qamtamasyz etilgen, olardyń sany 2020 jyly 12 mln zerttep-qaraýdy qurady. Nátıjesinde, 600 myńnan astam aýrý anyqtaldy.
«Qant dıabeti, gıpertonııa jáne júrek fýnktsııasynyń sozylmaly jetkiliksizdigi boıynsha aýrýlarǵa qatysty baǵdarlamany iske asyrý jalǵasýda. 2020 jyly dınamıkalyq baqylaýdaǵy patsıentterdiń 55 paıyzy osy baǵdarlamaǵa qatysty. Biz mobıldik medıtsınany belsendi engizýdemiz. Úıde medıtsınalyq kómek kórsetý úshin mobıldik brıgadalardyń sany 3 myń 700-ge jetti, onyń 49 paıyzy aýylda. Bul rette, 2020 jyly olar 750 myńnan astam medıtsınalyq qyzmet kórsetti. Bul úıde KVI bar naýqastarǵa medıtsınalyq kómek kórsetýde mańyzdy ról atqardy», - dedi mınıstr.
