Alekseı Tsoı Atyraý oblysyndaǵy aýyl aýrýhanasynda boldy

ATYRAÝ. QazAqparat – Búgin QR Densaýlyq saqtaý mınıstri Alekseı Tsoı Atyraý oblysyna jumys saparymen kelip, Maqat aýdandyq aýrýhanasynda, Baıgetóbe aýylyndaǵy feldsherlik-akýsherlik pýnktinde boldy, dep habarlaıdy QazAqparat.

Aýdandyq aýrýhana dırektory Asýlan Abdrahmanov koronavırýs ınfektsııasyna qatysty jaǵdaı týraly aıtyp berdi. Mınıstrge aýyldyq feldsherlik-akýsherlik pýnktinde jabdyqtar kórsetildi.

«Elimizdiń barlyq aýyldyq medıtsına mekemeleri osyndaǵydaı jabdyqtarmen qamtylmaǵan. Mundaǵy medıtsınalyq jabdyqtardyń basym bóligi halyqaralyq standarttarǵa sáıkes keledi. Al jetispeıtin jabdyqtar bolsa, óz tarapymyzdan jabdyqtaýǵa kómektesemiz», - dedi Alekseı Tsoı.

Aýyl dárigerlerimen áńgimelesken mınıstr Qazaqstannyń densaýlyq saqtaý salasyndaǵy jańashyldyqtar týraly aıtyp berdi. Eń aldymen, el úshin jasalyp jatqan isterge, medıtsına qyzmetkerleriniń múddesi men quqyqtaryn qorǵaýǵa, aq halatty jandardyń bedelin arttyrýǵa basa nazar aýdardy.

Densaýlyq saqtaý mınıstri oblys ortalyǵyndaǵy birneshe medıtsınalyq mekemege baratyny josparlanǵan.

Eske sala ketelik, byltyrǵy shilde aıynda Densaýlyq saqtaý mınıstri Atyraýdaǵy ınfektsııalyq sattsıonardy onlaın aralaǵan edi.