Alekseı Tsoı 1,5 jyl komadan oıanbaı, ómirden ozǵan búldirshin týraly aıtty

NUR-SULTAN. QazAqparat – QR Densaýlyq saqtaý mınıstri Alekseı Tsoı elordada tis emhanasyna barǵannan keıin komaǵa túsip, 1,5 jyldan keıin kóz jumǵan búldirshinge qatysty pikir bildirdi, dep habarlaıdy QazAqparat tilshisi.

«Bul is erekshe baqylaýda boldy. Ókinishke oraı kishkentaı qyz qaıtys boldy. 2020 jylǵy 9 sáýirde sot atalǵan stomatologııalyq ortalyqtyń qyzmetine tyıym salýdy, lıtsenzııasyn qaıtaryp alýdy úkim etken bolatyn. Sot zalynda ata-analarynyń ózderi medıtsınalyq uıymǵa talaptary joq ekendigin málimdep, atalǵan uıymnyń qyzmetin toqtatpaýdy ótindi», - dedi mınıstr Ortalyq kommýnıkatsııalar qyzmetindegi brıfıng barysynda BAQ ókilderiniń saýalyn oraı.

Degenmen, ol kez kelgen zań buzýshylyq, der ýaqytynda tıimdi kómek almaý faktisi boıynsha shaǵymdanýǵa bolatyndyǵyn basa aıtty.

«Mundaı shaǵymdardy qaraıtyn jáne qyzmetin toqtatýdan basap, sotqa shaǵym berýge deıingi barlyq tıisti protsedýrany qabyldaıtyn aýmaqtyq departamentterimiz, Farmatsevtıkalyq baqylaý komıtetimiz bar. Sondyqtan, eger mundaı jaıttar bolsa, onda azamattar zańdy tártippen shaǵymmen júginýi qajet. Olar qaralady», - dedi Alekseı Tsoı.

Eske salaıyq, 2020 jyldyń qańtar aıynda elorda turǵyny Anastasııa Zelenaıa eki jarym jastaǵy balasy stomatologııalyq klınıkaǵa qaralǵannan keıin es-tússiz kúıge túskenin habarlaǵan bolatyn.

Osydan keıin tis emhanasyna tekserý júrgizilip birqatar kemshilik anyqtalǵan edi. Al 21 maýsymda Anastasııa Zelenaıa Instagram paraqshasynda sábıinen aıyrylyp qalǵanyn jazdy.