Aleksandr Výchıch Nursultan Nazarbaevty Serbııaǵa shaqyrdy
«Biz eń joǵary deńgeıdegi kezdesý tájirıbemizdi jalǵastyra beremiz dep úmit artamyn. Jáne de jaqyn arada Serbııaǵa saparlap kelseńiz biz úshin úlken qurmet bolar edi», - dedi Aleksandr Vıchých Aqordadaǵy kelissózderden keıingi birlesken málimdeme barysynda Qazaqstan Prezıdentine qarata.
Sonymen qatar Serbııa Prezıdenti Nursultan Nazarbaevqa halyqaralyq deńgeıdegi kóptegen máselede qoldaý kórsetkeni úshin shynaıy rızashylyǵyn bildirip, ekijaqty baılanystardyń odan ary keńeıe túsetindigine senimdi ekendigin atap ótti.
«Aldaǵy ýaqytta yntymaqtastyǵymyzdy nyǵaıta túsip, taýar aınalymymyzdy arttyratyndyǵymyzǵa senimdimin. Óıtkeni, oǵan áli paıdalanylmaǵan áleýettiń jaqsy irgetasy bar. Sizder taıaý arada Belgradta Qazaqstan Elshiligin ashsańyzdar, qýanyshty bolar edik. Bul bizdiń úlken ótinishimiz», - dedi Serbııa Prezıdenti.
Aıta keteıik, Serbııa basshysy Qazaqstan Prezıdenti Nursultan Nazarbaevtyń shaqyrýymen resmı saparmen kelip otyr. Búgin mártebeli meıman Aqordada Elbasymen kezdesý ótkizdi.
Kezdesý barysynda Nursultan Nazarbaev Serbııa Prezıdentin «Dostyq» ordenimen marapattady.
Al Aleksandr Výchıch Qazaqstan Prezıdentine óz eliniń eń joǵary nagradasy «Serbııa Respýblıkasy» ordenin tabys etti.
Sapar aıasynda Aleksandr Výchıch Qazaqstan-Serbııa iskerlik forýmyna, Álemdik jáne dástúrli dinder kóshbasshylarynyń VI seziniń ashylýyna qatysady dep josparlanǵan.
Serbııa Prezıdentiniń sapary barysynda birqatar mańyzdy qujattarǵa qol qoıylmaq. Onyń ishinde Qazaqstan men Serbııa úkimetteri arasyndaǵy qylmysqa qarsy kúrestegi yntymaqtastyq týraly kelisim, sondaı-aq Qazaqstannyń Qoǵamdyq damý mınıstrligi men Serbııanyń Jastar saıasaty jáne sport mınıstrligi arasyndaǵy ózara túsinistik týraly memorandým bar.
Sondaı-aq Serbııa basshysy Elbasy Nursultan Nazarbaevtan Belgradta Qazaqstan Elshiligin ashýdy ótindi.
