Aleksandr Vınokýrovtyń uldary ákesiniń izin basyp, Qazaqstan atynan velojarystarǵa qatysyp júr

PETROPAVL. KAZINFORM – Soltústik Qazaqstan oblysynyń týmasy, Olımpıada chempıony, áıgili veloshabandoz «Astana Qazaqstan Team» komandasynyń bas menedjeri Aleksandr Vınokýrov Petropavlǵa keldi. 

SQO ákimi Ǵaýez Nurmuhambetov Aleksandr Vınokýrovpen kezdesip, aldaǵy josparlarymen tanysty. Bul jaıynda ol áleýmettik jelidegi paraqshasynda jazdy. 

«Aleksandr Nıkolaevıch Qazaqstanda velosporttyń damýy men tanymal bolýyna zor úles qosyp keledi. Onyń uldary Aleks pen Nıkolıa Vınokýrovtar da áke jolyn jalǵap, búginde velojarystarda oblysymyzdyń namysyn qorǵap júr. Nıkolıa Vınokýrov 23 jasqa deıingi toptyq jarysta Qazaqstannyń eki dúrkin chempıony jáne jastar arasyndaǵy Azııa chempıonatynyń qola júldegeri. Soltústikqazaqstandyq veloshabandozdardan quralǵan «Vino SKO Team» kontınenttik komandasy respýblıkalyq jáne halyqaralyq velojarystarǵa qatysyp júr. Taǵy bir ataqty velosportshymyz Alekseı Lýtsenko bıyl jazda Parıjde ótetin Olımpıadada baq synamaq. Alekseıge Aleksandr Vınokýrovtyń erligin qaıtalap, Olımpıada chempıony bolýyn tileımiz!», - dedi Ǵaýez Nurmuhambetov.