Aleksandr Vınokýrovtyń kıimi Lozannadaǵy Halyqaralyq Olımpıada murajaıyna syıǵa berildi
ASTANA. KAZINFORM — Olımpıada chempıony Aleksandr Vınokýrovtyń sporttyq kıimi alǵash ret Lozannadaǵy Halyqaralyq Olımpıada murajaıynyń kollektsııasyna qosyldy, dep habarlaıdy Kazinform agenttiginiń Jenevadaǵy menshikti tilshisi.
Aleksandr Vınokýrovtyń formasy Olımpıada oıyndarynyń tarıhy men álemniń túkpir-túkpirinen kelgen sportshylardyń jetistikterine arnalǵan jádigerler saqtalǵan mýzeıdiń turaqty kollektsııasynyń bir bóligine aınalady.
Іs-shara Dúnıejúzilik zııatkerlik menshik uıymy uıymdastyrǵan «Kópirler salý: ınnovatsııalar men shyǵarmashylyq — bolashaq qoǵamnyń qozǵaýshy kúshi» taqyrybyndaǵy beıresmı mınıstrlik saıası dıalogy aıasynda ótti. Qatysýshylar sporttyń, ınnovatsııalardyń, shyǵarmashylyqtyń jáne halyqaralyq yntymaqtastyqtyń elder arasyndaǵy baılanysty nyǵaıtýdaǵy, adam áleýetin ashýdaǵy jáne bolashaq urpaq úshin jańa múmkindikter qalyptastyrýdaǵy rólin talqylady.
Іs-sharada Qazaqstan atynan Ádilet mınıstri Erlan Sársembaev, Qazaqstannyń Dúnıejúzilik saýda uıymy jáne halyqaralyq ekonomıkalyq uıymdar janyndaǵy Turaqty ókili Qaırat Tórebaev, sondaı-aq olımpıada chempıony Aleksandr Vınokýrov qatysty.
Olımpıada chempıony sport adamnyń múmkindiginiń sheginen asýǵa úıretetinin, al jeńis eshqashan bir adamnyń eńbeginiń nátıjesi bolmaıtynyn aıtty. Onyń sózinshe, árbir jetistiktiń artynda komanda, bilim, tehnologııa, eńbek jáne senim turady. Sondaı-aq ol Qazaqstannyń adam áleýetin, bilim men ınnovatsııany damytýǵa basymdyq berip otyrǵanyn atap ótti.
Qazaqstannyń Dúnıejúzilik saýda uıymy janyndaǵy Turaqty ókildiginiń málimetinshe, olımpıada chempıonynyń sporttyq formasynyń Halyqaralyq Olımpıada mýzeıiniń kollektsııasyna engizilýi otandyq sport úshin mańyzdy oqıǵa boldy. Ókildik bul qadam qazaqstandyq sportshylardyń jetistikteri men olardyń álemdik olımpıadalyq qozǵalys tarıhyna qosqan úlesiniń halyqaralyq deńgeıde moıyndalǵanyn kórsetetinin atap ótti.
Eske sala keteıik, Olımpıada chempıony buǵan deıin Vatıkan memleketiniń basshysyna qazaqstandyq velokomandanyń jeıdesin syıǵa tartty.
