Aleksandr Vınokýrov jemqorlyq aıyby boıynsha aqtalyp shyqty
«Men bul máselege núkte qoıylyp, sottyń ádil sheshim qabyldaǵanyna óte qýanyshtymyn. Biz tek jarqyn bolashaqqa qaraımyz! Bıylǵy maýsymdy óte sátti ótkizdik. Alaıda áli kóp jumys pen jospar bar. Demalmaımyz!», - dep jazdy veloshabandoz Instagram paraqshasynda.
Eske sala ketsek, Belgııanyń prokýratýrasy jaqynda qazaqstandyq Aleksandr Vınokýrov pen reseılik Aleksandr Kolobnevke sybaılas jemqorlyqqa qatysty aıyp taqqan bolatyn. Belgııanyń Sudinfo.be basylymynyń habarlaýynsha, A.Vınokýrov 2010 jyly bedeldi «Lej - Baston - Lej» saıysynyń fınalynda júlde alý úshin A. Kolobnevke 150 myń eýro tólegen.
Aıta ketý kerek, A.Vınokýrov 2013 jyldan beri «Astana» komandasynyń bas menedjeri bolyp jumys isteıdi. A.Kolobnev reseılik «Katıýsha» velokomandasynda. Tamyz aıynda A.Vınokýrov Belgııa prokýrorynyń jemqorlyq qylmysy boıynsha taǵylǵan aıyby negizsiz ekenin málimdegen bolatyn.
«Bul maǵan taǵylǵan negizsiz aıyp. Bizden eshteńe tappaǵannan keıin prokýror birdeńe oılap taýyp, baspasózge jarııalaýǵa tyrysady. Bul durys emes. Munyń kimge paıdaly ekenin de dóp basyp aıta almaımyn », - dedi sol kezde Vınokýrov.