Aleksandr Vınokýrov úlken sportpen qosh aıtysatynyn resmı túrde jarııalady

dep habarlady QR Velosport federatsııasynyń baspasóz qyzmetinen.

17 shilde kúni A.Vınokýrov frantsýz telearnasyna bergen suhbatynda óziniń kásibı shabandoz retindegi sporttyq mansabyn aıaqtaıtyndyǵyn resmı jarııa etti. «Men kásibı retinde velosportqa qaıta oralmaımyn. Óz mansabymdy aıaqtaýǵa sheshim qabyldadym. Qazirgi ýaqytta «Pro Team Astana» basshylyǵymen maǵan komandadaǵy jańa ról izdestirý ústindemiz», - dedi ol suhbat barysynda.

«Pro Team Astana» komandasynyń veloshabandozdary A.Vınokýrovtyń úlken sporttan ketpek oıyn keshe, 17 shildede kezekti kezeń aıaqtalǵannan keıin estidi. Osyǵan oraı óz pikirin bildirgen Maksım Iglınskıı: «Ol naǵyz dos ári chempıon. Ol jarysta jeńiske jetkende maǵan zor jiger beretin. Menińshe, ol bizdiń bárimizge de úlgi bolarlyq», - deıdi.

Aıta keteıik, sportshynyń Týr de Franstyń 9-shy kezeńinde qulap, aýyr jaraqat alǵanyn QazAqparat buǵan deıin habarlaǵan bolatyn. Toptyń basynda kele jatqan «Astana» komandasynyń kóshbasshysy eńiske túsý kezinde joldyń shetine shyǵyp ketip, qulaǵan edi. Vınokýrov shuǵyl Orıık gospıtaline jetkizilip, onda rentgenge túsiriledi. Onyń oń jaq jambas súıegi synǵany anyqtalady. 10 shilde kúni keshke Parıjdegi La Pitié Salpetriere gospıtaline jetkizilip, operatsııa jasalady.

«Operatsııa sátti ótti. Erteń Aleksandrǵa Qazaqstannan zaıyby ushyp keledi», - delingen resmı habarlamada.

Vınokýrovtyń aıtýynsha, Týr de Frans týrnıri ol úshin mundaı aýyr aıaqtalady dep eshqashan oılamaǵan eken. «Bul men úshin ókinish, men búgin qatty qapalanyp otyrmyn. Biraq, jaǵdaıdyń budan da jaman bolýy yqtımal edi ǵoı dep ózimdi jubatýdamyn. Alǵan jaraqatym meni endi biraz ýaqytqa toqtatyp otyr, sondyqtan da Týrdy teledıdar arqyly kórip, «Astana» komandasyna jankúıer bolamyn. Dostarymnyń meni umytpaıtynyna, bir kezeńde bolsa da jeńiske jetýge tyrysatyndaryna senemin»,- deıdi sportshy.

Komanda kóshbasshysynyń jarys jolynan shyǵyp qalýy jalpykomandalyq esepke áserin tıgizetini sózsiz. A. Vınokýrov jalpy esepte 11-shi bolyp kele jatqan jáne kóshbasshy 9-shy kezeńge deıin kóshbasshy bolǵan Team Garmin-Cervelo komandasynyń ókili norveg Tor Hýshovdqa nebári 32 sekýnd ese jiberip kele jatqan edi.