Aleksandr Vınokýrov Úlken Almaty kóli mańyndaǵy qoqysty jınaýǵa shyqty
ASTANA. QazAqparat - Olımpıada chempıony Aleksandr Vınokýrov Úlken Almaty kóli mańyn qoqyspen lastaǵandardy synady, dep habarlaıdy QazAqparat.
«Dostar, biz ásem Úlken Almaty kóline qaraı baryp, ondaǵy kóriniske tańǵalyp turmyz. Adamdar qoqysty ár jerge tastaı bergen. Árbir adam tabıǵatqa qamqorlyqpen qaraýy úshin osy rolıkti túsirdik. Turyp jatqan qalalaryńyzǵa súıispenshilikpen qarap, lastamańyzdar. Barǵan jerleńizdi jınastyryp júrińizder», - dep jazdy chempıon óziniń Instagram paraqshasynda.
Aleksandr Vınokýrov jaqynda Almatyǵa tanymal veloekstremalshy, velokaskader Vıttorıo Brýmottı kelgenin, ol jergilikti tabıǵatpen tanysqanyn atap ótti.
«Dostar, uıat bolyp tur. Sizder osynda tastaǵan qoqysty jınaýǵa májbúr boldyq. Álemdi ózgertkiń kelse, aldymen ózińnen basta. Eger de árbir adam aınalasyna uqyptylyqpen qarasa, onda barlyq jerdi qoqystan tazarta alamyz», - dedi Olımpıada chempıony.
