Aleksandr Vınokýrov: «Tour of Almaty» sııaqty jarystardy kóp uıymdastyrý kerek
NUR-SULTAN. QazAqparat –Velosporttan Olımpıada chempıony, Astana Pro Team komandasynyń bas menedjeri Aleksandr Vınokýrov elimizde «Tour of Almaty» sekildi jarystardy jıi uıymdastyrý qajet dep esepteıdi. Bul týraly QazAqparat Qazaqstan velosporty federatsııasynyń baspasóz qyzmetine silteme jasap habarlaıdy.
Onyń oıynsha mundaı saıystar qazaqstandyq shabandozdarǵa óte paıdaly. Sebebi, olardyń árbir upaıy olımpıadalyq reıtıngke áser etip, quramanyń jaǵdaıyn jaqsarta túsedi.
«Bul ıdeıa uzaq ýaqyt boıy bizdiń armanymyz bolyp júrdi. 7 jyl buryn sol ıdeıa is júzine asty. Alǵashqyda ol birkúndik jarys boldy. Ótken jyly jarysty eki kún qatar ótkizdik. «Medeýge» máreni belgilep, Almatynyń ǵalamat tabıǵatyn álemge pash ettik. Almatyny tańdaǵanymyzdyń da sebebi túsinikti. Munda burynnan jarystar ótip keldi, ári qalanyń kórseter tustary jeterlik» deıdi sportshy.
Sondaı-aq, Aleksandr Vınokýrov «Astana» shabandozshylary týraly da aıtty.
«Bizdiń komanda - Pro-týrdyń ishindegi eń myqtylardyń qataryna jatady. Sondyqtan ózimizde ótip jatqan«Tour of Almaty» dodasynda jeńiske jetkimiz keledi. Bıylǵy jarys otandyq shabandozdar úshin óte mańyzdy. Mysaly Pronskıı Vino Astana Motors qurlyqtyq komandasynyń atynan qatyssa da ol ıelengen upaılar Qazaqstan ulttyq quramasynyń qorjynyna túsedi. Bizdiń qurama TOP-21 quramyna kirse biz Olımpıada oıyndaryna 3 sportshy qatystyra alamyz. Sondyqtan da reıtıngtik upaılarǵa talasý qajet»,- dedi ol.
Eske salsaq, bul jarys týraly buǵan deıin habarlaǵan bolatynbyz.
