Aleksandr Vınokýrov: Sońǵy synaq Monakoda ótedi
ASTANA. 29 qyrkúıek. QazAqparat - Ústimizdegi jyldyń 7 qazanynda Aleksandr Vınokýrov eń sońǵy ret jarys jolyna shyǵýdy josparlap otyr.
Sol kúni dańqty veloshabandoz Monakoda ótetin 50 shaqyrymdyq krıterıým saıysynda baq synaıdy. Bul jaıynda «Alaman» sport agenttigi habarlap otyr.
Vınokýrov álemdik deńgeıde moıyndalǵan sportshy. Onyń sporttyq ómirbaıany jarqyn jeńister men tolaǵaı tabystarǵa toldy. Aleksandr kóptegen halyqaralyq jarystarda bas júldeni oljalady. «Výelta» dodasynda top jardy. Ár jyldary «Týr de Frans» kópkúndiginiń kezeńdik saıystarynda jeńimpaz atanyp, jalpy esepte úshinshi orynǵa taban tiredi. Ol uzaq jyldar boıy Qazaqstan Ulttyq quramasy men «Astana» klýbynyń serkesi boldy. Álem chempıonatynda eki ret qola medaldi ıelendi. Azıada da aldyna jan salǵan joq. 2000 jyly Sıdneıde alaýy tutanǵan Olımpıada oıyndarynda kúmis medaldi qanjyǵasyna baılasa, 2012 jyly London Olımpıadasynda altyn tuǵyrǵa kóterildi. Tumandy Albıon elindegi jeńisinen keıin 39 jastaǵy Vınokýrov úlken sportpen qosh aıtysatynyn málimdedi. Endi ol óziniń súıikti isinen qol úzer aldynda qoshtasý jarysyn uıymdastyrýdy jón kórdi. «Monakodaǵy doda men úshin sporttyq kareramdaǵy eń sońǵy synaq. Sol sebepti de osy jarys barysynda barlyq dostarymnyń basyn qosqym keledi», deıdi áıgili veloshabandoz.
