Aleksandr Vınokýrov Rım Papasyna qazaqstandyq komandanyń jeıdesin syılady
ASTANA. KAZINFORM — Olımpıada chempıony jáne XDS Astana Team komandasynyń bas menedjeri Aleksandr Vınokýrov Vatıkan memleketiniń basshysyna qazaqstandyq velokomandanyń jeıdesin syıǵa tartty.
Óz kezeginde Rım Papasy Lev XIV komandany «Djıro d’Italııadaǵy» jarqyn ónerimen quttyqtap, shabandozdarǵa aldaǵy ýaqytta jańa jeńister men jetistikter tiledi.
Maýsymnyń alǵashqy sýperkópkúndigi — «Djıro d’Italııa» keshe, 31 mamyr kúni Rımde aıaqtaldy jáne XDS Astana Team úshin sońǵy jyldardaǵy eń tabysty jarystardyń birine aınaldy. Komanda úsh kezeńde jeńiske jetip, jarys barysynda «Djıronyń» basty sımvoly — áıgili qyzǵylt jeıdeni kııý mártebesine ıe boldy.
— Komanda «Djıro d’Italııada» jarqyn óner kórsetip, álemdegi eń iri velojarystardyń birinde Qazaqstandy laıyqty tanystyrý úshin bar kúshin saldy. Osyndaı joǵary halyqaralyq deńgeıde aıtylǵan tilekterdi qabyldaý — biz úshin úlken mártebe ári alǵa jyljyp, jańa jeńisterge jetýge qosymsha motıvatsııa, — dedi Aleksandr Vınokýrov.
Quttyqtaýdyń dál Rımde «Týr de Frans» jáne «Výelta Ispanııamen» qatar álemdegi eń iri úshvelojarystyń biri sanalatyn «Djıro d’Italııa» aıaqtalyp jatqan sátte aıtylýy erekshe mánge ıe.
XDS Astana Team 1565 upaı jınaǵan «Djıro d’Italııa» qorytyndysy boıynsha qazaqstandyq komanda UCI álemdik komandalyq reıtıngindegi 5-ornyn saqtap qaldy. Maýsymnyń alǵashqy bes aıynda komanda 8318.71 upaı jınady.
Sonymen qatar jobanyń kontınentaldyq komandasy — XDS Astana Development Team jetistikterin de atap ótken jón (komanda shabandozdarynyń 50%-y Qazaqstan ókilderi). 2026 jylǵy maýsymda komanda 5 jeńis pen 5 júldeli orynǵa qol jetkizip, qazirgi ýaqytta UCI kontınentaldyq komandalar reıtınginde úshinshi orynda keledi jáne Álemdik Týr komandalarynyń jastar jobalary arasynda absolıýtti kóshbasshy bolyp otyr. 891.1 upaı jınaǵan XDS Astana Development Team eń jaqyn qarsylasy — UAE Team Emirates Gen Z jastar komandasynan 300-den astam upaıǵa ozyp tur.
XDS Astana Team men XDS Astana Development Team-niń jarqyn maýsymy qazaqstandyq jobanyń kásibı velosport álemindegi ornyn nyǵaıtýdy jalǵastyryp, Qazaqstannyń halyqaralyq sport arenasyndaǵy ımıdjin ilgeriletýge yqpal etýde.
Aıta ketelik Qasym-Jomart Toqaev Rım Papasy XIV Leony Astanaǵa shaqyrǵan edi.
