Aleksandr Vınokýrov Petropavlda jas sportshylarmen kezdesti
SQO dene shynyqtyrý jáne sport basqarmasy baspasóz qyzmetiniń málimetinshe, «Astana Pro Team» kásibı velokomandasynyń bas menedjeri Aleksandr Vınokýrov Petropavlda velosport boıynsha olımpıadalyq rezervtegi balalar men jasóspirimderdiń oblystyq mamandandyrylǵan mektebiniń tárbıelenýshilerimen kezdesti.
Olımpıada chempıony týǵan jerge jıi kelýge tyrysady. SQO Beskól aýylynda onyń ata-anasy turady. Týǵan-týystarymen kezdesip qana qoımaı, ózi bala kezinde jattyqqan sport mektebine bas suǵady, jattyqtyrýshylarmen, jas sportshylarmen kezdesedi.
Petropavldaǵy № 17 orta mekteptiń jertólesinde velomekteptiń bazasy ornalasqan. Bul jerde búginde 60 bala jattyǵyp júr. Jalpy velosport boıynsha olımpıadalyq rezervtegi balalar men jasóspirimderdiń oblystyq mamandandyrylǵan mektebinde 260 tárbıelenýshi bar.
Aleksandr Vınokýrovtyń aıtýynsha, Soltústik Qazaqstan oblysy velosporttan bolashaq chempıondardy daıarlaýda elimiz boıynsha aldyńǵylardyń qatarynda.
Bul – osy sport túrin damytýǵa qoldaý bildirip otyrǵan óńir basshylyǵynyń jáne jergilikti metsenattardyń arqasy.
Osyndaı demeýshilerdiń biri – velosıped sporty oblystyq federatsııasynyń prezıdenti Muhtar Igibaev. Ol óz qarajatyna iri jarystar uıymdastyryp, halyqaralyq, respýblıkalyq saıystarda úzdik nátıje kórsetken mektep tárbıelenýshilerine jáne olardyń jattyqtyrýshylaryna syıaqy berýdi dástúrge aınaldyrǵan.
Bıyl №17 orta mekteptiń jertólesinde ornalasqan velobazany kúrdeli jóndeýge 7 mln teńge bóldi. Nátıjesinde nysannyń ishi jyly, jaryq jáne jeldetý júıesin jańartqandyqtan sportshylarǵa jattyǵý barysynda demalý jeńildedi.
Vınokýrov tárbıelenýshilermen tildesip, jattyǵýlaryna qatysty. Bolashaq chempıondarǵa aqyl-keńesin berdi.
Búginde «Vino-Astana Motors» komandasyna 12 soltústikqazaqstandyq sportshy múshe, onyń úsheýi qatarǵa bıyl qosyldy.
Al «Astana Pro Team» komandasy quramynda Qyzyljar óńiriniń týmasy 20 jastaǵy Gleb Brýsenskıı óner kórsetip júr.
