Aleksandr Vınokýrov Olımpıada kúnine arnalǵan velosherýdi bastady
Bul mereke jyl saıyn 23 maýsymda atap ótiledi. Atalǵan mereke Qazaqstanda 28-shi ret toılanbaq. Osyǵan oraı, Ulttyq Olımpıadalyq komıtet búkil maýsymdy olımpıadalyq qundylyqtarǵa arnaıdy. Barlyq is-sharalar halyqaralyq olımpıadalyq qozǵalystyń «Bárimiz birge: jyldam, bıikke, myqty» jańa uranymen ótedi.
Vınokýrov atyndaǵy sport saraıynan júzden astam veloshabandoz velosherýge qatysty. Eresekter men balalar qala kóshelerimen 10 shaqyrymdaı júrip ótti.
Qatysýshylarǵa Olımpıada kúnine qatysqany úshin Halyqaralyq Olımpıada komıtetiniń basshysy Tomas Bah pen elimizdiń Ulttyq Olımpıadalyq komıtetiniń prezıdenti Tımýr Qulybaevtyń qoly qoıylǵan sertıfıkattar tabystaldy.
«Men osynda kelgenime jáne sportty súıetin jerlesterimmen kezdeskenime qýanyshtymyn. Bul kúnderi velosporttan Qazaqstan chempıonaty ótip jatyr, sondyqtan Petropavldy dál qazirgi tańda velosıpedshiler mekeni dep ataýǵa bolady. Búgingi sharaǵa qatysqandar qatarynda bolashaq olımpıadashylardyń bar ekenine senimdimin», - deıdi Olımpıada chempıony Aleksandr Vınokýrov.
«Osyndaı uzaq qashyqtyqty baǵyndyrǵanym úshin keýdemdi maqtanysh kerneıdi. Ata-anam da jankúıerlik tanytyp, qoldaý bildirdi. Búgingi mereke – tamasha mereke bolyp sanalady. Endi jyl saıyn atap ótemin dep oılaımyn», - deıdi velosherýge qatysýshy Anııa Baıgýjınova.
Olımpıada kúni aıasynda merekeni atap ótý 20 maýsymda Almatyda sporttyq quzǵa órmeleý boıynsha saıyspen jalǵasady. 21 maýsymda Aqtaýda boks jáne dzıýdodan sheberlik synyptary ótkizilse, 23 maýsymda elordada basketbol oıyndary, strıt vorkaýt, kanoede esýden jáne tekboldan saıystar uıymdastyrylatyn sporttyq shara ótedi.
