Aleksandr Vınokýrov keleshekte «Astana» veloklýbynyń basshysy bolýy múmkin
ASTANA. Qyrkúıektiń 17-si. QazAqparat /Jasulan Amanbaıuly/ - Aleksandr Vınokýrov keleshekte «Astana» veloklýbynyń basshysy bolýy múmkin. Búgin, juma kúni ótken baspasóz máslıhatynda Qazaqstannyń velosport qaýymdastyǵynyń prezıdenti, «Samuryq-Qazyna» UÁQ-nyń tóraǵasy Qaırat Kelimbetov muny teriske shyǵarǵan joq.
«Bolashaqta Aleksandr Vınokýrov «Astana» veloklýbyna jarqyn basshy bola alatynyna senimdimiz, sebebi klýb jaıly Aleksandrdan jaqsy biletin adam joq», dedi Q. Kelimbetov.
A. Vınokýrov bolsa, bir jyldan keıin óziniń kásibı velojarystarǵa qatysýyn toqtatýy múmkin degen sózdiń shetin shyǵaryp qaldy.
«Kelesi jyly men jarystarǵa qatysatynym aıdan anyq. Odan keıingi jyldardy kóre jatarmyz, biraq meniń jasym 37-ge toldy, sondyqtan men 50 jasqa deıin velosıpedti teýip júre almaımyn», dep atap kórsetti ol.
Kelesi jylǵy maýsymda A. Vınokýrov «Astana» komandasyna Týr de Fransta jeńiske jetýge kómektesetin bolady.
Qazaqstandyq áıgili sportshy Aleksandr Vınokýrovtyń sporttan eki jylǵa alastatylǵannan keıin, eresek jasyna qaramastan sportqa oralýynyń ózi bir jetistik boldy.
«Men velosportqa oralyp, ózimdi dáleldep, maqsatymdy júzege asyrdym dep sanaımyn», dedi ol.
Osy kúnderi Alberto Kantador, Aleksandr Vınokýrov Astanada júr. Olar «Samuryq-Qazyna» qorynyń shaqyrtýymen kelgen bolatyn. Erteń sportshylar Almatyǵa attanyp, onda jastarǵa arnap sheberlik synyptaryn ótkizedi. Sonymen qatar Almaty ákimimen birge, qalanyń mereıtoıyna qarsy velojarysqa shyǵady.
