Aleksandr Vınokýrov Qazaqstannyń eńbek sińirgen jattyqtyrýshysy atandy
ASTANA. KAZINFORM — Bul habardy jelidegi paraqshasyna Týrızm jáne sport mınıstri Ermek Marjyqpaev jazdy.
«Velosporttan elimizdiń eńbek sińirgen sport sheberi, London Olımpıadasynyń chempıony Aleksandr Vınokýrovpen kezdestim. Dańqty veloshabandozymyz otandyq sportty, onyń ishinde velosportty damytý jolynda qajyrly eńbek etip keledi. 2013 jyldan beri ol álemge áıgili „Astana“ velokomandasyn basqarady», — dep jazdy mınıstr.
Kezdesý barysynda Aleksandr «Astana» velokomandasynyń halyqaralyq jarystardaǵy nátıjesi men bolashaq damý josparlary týraly aıtyp bergen. Velosporttan ulttyq quramanyń kóshbasshylary osy ujymnyń ókilderi ekeni belgili. Basqosýda osy jazda Parıjde ótetin Olımpıadada el namysyn qorǵaıtyn veloshabandozdardy daıyndaýdyń jeke jospary talqylanǵan.
«Jıyn sońynda Aleksandrǵa Qazaqstannyń eńbek sińirgen jattyqtyrýshysy qurmetti ataǵyn tapsyrdym. Ol óz kezeginde jazda ulttyq quramamen birge Parıj Olımpıadasyna barýǵa ýáde berdi. Onyń sporttaǵy tájirıbesi men qoldaýy bizdiń sportshylarǵa tórtjyldyqtyń basty dodasynda laıyqty óner kórsetýge kómektesedi dep senemin», — deıdi Ermek Marjyqpaev.
