Aleksandr Vınokýrov «Astana-dýatlon - 2016» jarysyna qatysady (FOTO)
ASTANA. QazAqparat - Tanymal qazaqstandyq veloshabandoz, Olımpıada chempıony Aleksandr Vınokýrov jeksenbi kúni, 26 maýsymda Astanada ótetin dýatlonnan jarysqa qatysady, dep habarlaıdy elorda ákimdiginiń baspasóz qyzmeti.
Sportshy «Astana dýatlon-2016» sharasyna qatysýshylarmen birge úsh qashyqtyqty baǵyndyrady - 5 shaqyrymqa júgirý, 15 shaqyrymdy velosıpedpen júri ótý, jáne sońǵy kezeń - taǵy da 5 shaqyrym qashyqtyqqa júgirý. Qashyqtyqtyń jalpy uzyndyǵy - 25 shaqyrym - ol Qazaqstan Respýblıkasy Táýelsizdiginiń 25 jyldyq mereıtoıyna oraılastyrylǵan.
Buryn habarlanǵandaı, Elorda kúnin merekeleýge oraı dýatlonnan jarys Astanada ekinshi ret ótkiziletin bolady. Sporttyq shara Astananyń sol jaǵalaýynda uıymdastyrylyp, «Báıterek» monýmentiniń aldyndaǵy alańnan bastalady. Júgirý Qonaev kóshesinen bastalady, odan ári qatysýshylar Qabanbaı batyr dańǵyly, Dostyq jáne Orynbor kóshelerimen júgirip ótedi. Márede jasalǵan arnaıy aımaqta sportshylar velosıpedke otyryp, jarysty jalǵastyrady. Velojarys ta Qonaev kóshesinen bastalyp, Qabanbaı batyr dańǵylymen jalǵasady, dýatlonǵa qatysýshylar NZM (Nazarbaev zııatkerlik mektebi) janynan qaıta aınalyp Kereı jáne Jánibek handar kóshesine deıin barady, sodan keıin osy jolmen Orynbor kóshesine deıin júredi, velojarys Qonaev kóshesinde máresine jetedi.
«Astana-dýatlon - 2016» jarysyna 16 jastan asqandardyń bári de qatysa alady. Qatysýshylardy tirkeý shara ótetin kúni «Báıterek» monýmentiniń aldyndaǵy alańda tańǵy saǵat 7-den bastalyp, týrnırge 15 mınýt qalǵanda aıaqtalady. Dýatlon tańǵy saǵat 10.00 bastalady. Biraq 18-ge tolmaǵandar tirkelý úshin ata-anasynyń jazbasha ruqsatyn ákelýi kerek. Jarysqa qatysýshylar ózderimen birge jeke kýálikterin ala kelýi qajet.
Byltyrǵydaı árbir qatysýshynyń ýaqyty jeke belgilenedi. Jarys jeńimpazdary qashyqtyqty baǵyndyrýǵa jumsalǵan eń az ýaqyt kórsetkishteri boıynsha birneshe topta anyqtalady. Jarys qorytyndysy boıynsha jeńimpazdarǵa baǵaly syılyqtar men dıplomdar, sonyń ishinde Astananyń tańdaýly fıtness klýbyna jyldyq abonement, velosıpedter jáne t.b. tabystalady.
Saltanatty marapattaý rásiminen keıin «Báıterek» monýmentiniń aldyndaǵy alańda dýatlonǵa qatysýshylar men shara qonaqtarynyń nazaryna kontserttik baǵdarlama usynylady.
«Astana-dýatlon-2016» jarysynyń reglamentimen www.astanaday.kz saıtynan tanysýǵa bolady.
