Aleksandr Vınokýrov «Astana-dýatlon 2015» jarysyna qatysady
ASTANA. QazAqparat - Olımpıada chempıony Aleksandr Vınokýrov «Astana-dýatlon 2015» jarysyna qatysady. Astana qalasynyń ákimdigi erteń, 29 tamyzda, atalmysh sharany Qazaqstan Respýblıkasy Konstıtýtsııasynyń 20 jyldyǵyna oraı ótkizedi, dep habarlaıdy vedomstvonyń baspasóz qyzmeti.
Sporttyq shara saǵat 10:00 «Báıterek» monýmentiniń aldyndaǵy alańnan bastalady. Jarysqa qatysýshylar tanymal qazaqstandyq veloshabandozben birge 15 shaqyrym velosıpedpen júrip ótedi, sodan keıin 5 shaqyrym qashyqtyqqa júgiretin bolady.
Aıta keteıik, jarysqa kez kelgen 16 jastan asqan adam qatysa alady. Árbir qatysýshynyń ýaqyty tirkeý kezinde beriletin derbes chıptiń kómegimen jeke belgilenetin bolady.
Tirkeý sóreniń janyndaǵy aýmaqta saǵat 7:00-den 9:30 deıin ótedi. Árbir qatysýshy jarys bastalmas buryn arnaıy ornatylǵan pýnktterde medıtsınalyq tekserýden ótedi. Budan basqa, velosıpedterge tegin qyzmet kórsetý de qarastyrylǵan.
Demalys kúnderi elordada ótetin dýatlon jarysynda júldeli oryndar erler men áıelder arasynda úsh jas sanaty boıynsha anyqtalatyn bolady.
Jeńimpazdar eń jas sanat 16-35 jas aralyǵynda, sondaı-aq ekinshi sanat 36-50 jas aralyǵynda jáne 51 jastan asqan sportshylar arasynda anyqtalady.
Bas júlde - bedeldi fıtness-klýbqa jyldyq abonement «Astana-dýatlon 2015» absolıýtti chempıonyna tabystalady. Jarystyń eki kezeńin de eń az ýaqyt aralyǵynda baǵyndyrǵan sportshy jasy men jynysyna qaramastan absolıýtti chempıon atalady.
Sonymen qatar, árbir dýatlet máreden keıin ótkiziletin lotereıa utysynda baǵyn synaıdy.
Jarysqa kez kelgen velosıpedpen qatysýǵa bolady. Sportshy mindetti túrde dýlyǵa kııýi kerek.
