Aleksandr Vınokýrov 10 jasar balanyń armanyn oryndady (FOTO)
ASTANA. QazAqparat - Belgili qazaqstandyq sportshy, Olımpıada chempıony Aleksandr Vınokýrov belgııalyq otbasy asyrap alǵan 10 jasar qazaqstandyq bala Sergeı Remeısenniń armanyn oryndaı otyryp, oǵan «Astana» velokomandasynyń formasyn syıǵa tartty, dep habarlaıdy QazAqparattyń Brıýsseldegi tilshisi.
«Astana Pro Team» sporttyq formasyn A. Vınokýrovtyń atynan Qazaqstannyń Belgııadaǵy Elshiliginiń konsýly Bolat Temirbaev tabystady. Fýtbolkaǵa olımpıada chempıony óz qolymen 10 jasar Sergeıge «S naılýchshımı pojelanııamı Sergeıý ot A.Vınokýrova» degen tilekterin jazyp bergen.
Bul bastama kezdeısoq týyndaǵan joq. 2013 jyldyń sońynda «Qazaqstan» arnasyndaǵy «Sheteldegi qazaq balalary» baǵdarlamasynyń bir sanynda dál osy Sergeı keıipker bolǵan edi. Sol kezde bala óziniń velosportpen shuǵyldanatynyn jáne bolashaqta A. Vınokýrov sııaqty ataqty veloshabandoz bolǵysy keletinin aıtqan bolatyn. Sonymen qatar, baǵdarlama júrgizýshisi de, kórermender de balanyń A. Vınokýrovqa qatty uqsaıtynyn baıqaǵan.
Osy sıýjetti kórgen soń A. Vınokýrovta kishkentaı Sergeıge óz qoltańbasymen forma syılaý ıdeıasy týyndaǵan eken.
Sergeı Remeısen óz kezeginde A. Vınokýrovtyń mundaı syılyǵyna qatty qýandy. Belgııadaǵy QR elshiliginde formany birden kıip kórgen bala A. Vınokýrovqa alǵysyn aıtyp, bolashaqta ataqty sportshy bolýǵa ýáde berdi. «Rahmet, Aleksandr Vınokýrov», - dedi ol qýana kúlip.
