Aleksandr Ýsık taǵy da asa aýyr salmaqta absolıýtti álem chempıony atandy

ASTANA. KAZINFORM — Ulybrıtanııanyń London qalasynda ýkraınalyq boksshy Aleksandr Ýsık (23-0, 14 KO) pen brıtandyq Danıel Dıýbýa (22-2, 21 KO) arasyndaǵy revansh-jekpe-jek ótti, dep habarlaıdy Sports.kz.

Olar asa aýyr salmaqta absolıýtti álem chempıony ataǵyn sarapqa saldy. Jekpe-jek on eki raýndqa josparlanǵan edi. Degenmen besinshi raýndta Ýsık qarsylasyn nokaýtqa jiberdi.

Osylaısha, Aleksandr Ýsık kásipqoı mansabyndaǵy 24-shi jeńisine qol jetkizip, taǵy da hevıveıt salmaǵynda absolıýtti álem chempıony atandy.

Al Danıel Dıýbýa úshin bul kásibı rıngtegi úshinshi jeńilisi boldy.

Eske salsaq, Ýsık pen Dıýbýa arasyndaǵy alǵashqy jekpe-jek 2023 jyldyń tamyzynda ótip, toǵyzynshy raýndta ýkraınalyq boksshynyń jeńisimen aıaqtalǵan bolatyn.

Buǵan deıin Memleket basshysy Qasym-Jomart Toqaev ulttyq qurama boksshylaryn quttyqtaǵanyn jazǵanbyz.