Aleksandr Shevchenko Ýımbldondaǵy alǵashqy kezdesýi týraly pikir bildirdi
ASTANA. KAZINFORM — Qazaqstandyq tennısshi Aleksandr Shevchenko Ýımbldon týrnıri bastalar aldynda óziniń fızıkalyq jaǵdaıy men týrnırdiń basty favorıtteriniń birimen ótetin aldaǵy match týraly aıtty, dep habarlaıdy Kazinform agenttiginiń Londondaǵy menshikti tilshisi.
Álemdik reıtıngte 98-orynda turǵan qazaqstandyq tennısshi Aleksandr Shevchenko Ýımbldonnyń alǵashqy aınalymynda álemniń tórtinshi raketkasy, kanadalyq Felıks Oje-Alıassımmen kezdesedi. Kazinform agenttigine bergen eksklıýzıvti suhbatynda ol týrnırge qandaı daıyndyqpen kelgenin jáne matchtaǵy múmkindigin qalaı baǵalaıtynyn aıtyp berdi.
Sportshy Ýımbldonǵa daıyndyǵy týraly sóz qozǵap, densaýlyǵyna baılanysty shóp ústindegi maýsymǵa tolyqqandy ázirlene almaǵanyn jasyrmady.
— Shynyn aıtsam, daıyndalýǵa ýaqyt asa kóp bolmady. Sebebi densaýlyǵym syr berip, tizemdegi eski jaraqat qaıta qozdy. Sondyqtan qalypty daıyndyq júrgizý óte qıyn boldy. Shóp tósenishinde tek dúısenbi kúni ǵana jattyǵa bastadym. Maıorkadaǵy týrnırde bir ǵana match ótkizdim, onyń ózine oıynǵa bir kún qalǵanda ǵana bardym. Sońǵy kúnderi jaman oınap júrgen joqpyn, babymdamyn. Qarsylas óte myqty, sondyqtan bárin match kórsetedi, — dedi qazaqstandyq tennısshi.
Shevchenko densaýlyq jaǵdaıy týraly egjeı-tegjeıli aıtyp ótti. Onyń sózinshe, qazirgi tańda ózin áldeqaıda jaqsy sezinedi. Alaıda tizesindegi jaraqaty sozylmaly.
— Qazir jaǵdaıym birshama túzeldi. Maǵan ár úsh aı saıyn tizeme ekpe saldyrýǵa týra keledi. Másele tizemdegi shemirshekte. Sekirý qıyn bolǵandyqtan, kortta erkin qımyldaý úshin únemi ekpe alyp turamyn, — dedi sportshy.
Sondaı-aq Shevchenko bolashaq qarsylasynyń myqty tustaryna da toqtaldy. Onyń pikirinshe, kanadalyq tennısshiniń eń qaýipti qarýy — dopty qýatty túrde berýi jáne oń qolmen jasaıtyn soqqysy.
— Onyń myqty tusy – dopty oıynǵa qosýy men oń jaqtan jasaıtyn soqqysy. Eger onyń bul soqqylary erekshe jaqsy shyqsa, oǵan qarsy oınaý óte qıyn. Al eki qolmen jasaıtyn bekhend soqqysy onyń álsizdeý qyry, — dedi tennısshi.
Aldaǵy oıynǵa arnalǵan taktıkasy jaıly aıtqan Shevchenko match barysynda túrli amaldardy qoldanýǵa nıetti ekenin jetkizdi.
— Men oń jáne sol jaqpen de jaqsy oınaımyn. Múmkin, qarsylastyń oń jaq soqqysyndaı qýatty oınaı almaıtyn shyǵarmyn, biraq meniń álsiz tusym aıqyn emes. Ony sol jaqtan jasalatyn soqqylar arqyly qyspaqqa alýǵa tyrysamyz. Dopty qabyldaý kezinde túrli kombınatsııalar daıyndaımyz, qajet jerde torǵa shyǵamyz, keıde qysqa soqqylar qoldanamyz. Jalpy, ony jeńýge bolady, — dedi ol.
Tennısshi sondaı-aq qarsylasynyń joǵary reıtıngi psıhologııalyq qysym týdyra ma degen saýalǵa da jaýap berdi. Onyń aıtýynsha, bul kezdesýde jaýapkershilik kóbirek kanadalyq sportshyǵa júkteledi.
— Onyń jaýapkershiligi joǵaryraq. Óıtkeni ol – álemniń tórtinshi raketkasy. Sondyqtan qysym da kóbirek soǵan túsedi. Al men bolsam, ózimdi birshama erkin sezinemin, — dedi Aleksandr Shevchenko.
Aıta keteıik, Felıks Oje-Alıassım – álemdegi eń myqty tennısshilerdiń biri. Alaıda ol ázirge «Úlken dýlyǵa» týrnırleriniń eshqaısysynda chempıon atana alǵan joq. Soǵan qaramastan, kanadalyq sportshy erler arasyndaǵy jekeleı synda «Úlken dýlyǵa» tıtýlyn jeńip alǵan alǵashqy kanadalyq atanýǵa basty úmitkerlerdiń biri.
Buǵan deıin qazaqstandyq tennısshi Anna Danılına Ýımbldon týrnırine daıyndyǵy týraly aıtty.
