Aleksandr Shevchenko Rolan Garros týrnıriniń kelesi aınalymyna joldama aldy
ASTANA. KAZINFORM — Qazaqstannyń ekinshi, álemniń 103-raketkasy Aleksandr Shevchenko Parıjde ótip jatqan Rolan Garros týrnıriniń ekinshi aınalymyna shyqty.
Qazaqstandyq tennısshi irikteý saıystarynyń fınalynda jeńilis tapqanymen, keıin negizgi jarysqa shaqyrtý alǵan edi.
Bul múmkindikti A.Shevchenko tıimdi paıdalandy. Alǵashqy aınalymda dúnıejúzilik reıtıngide 125-orynda turǵan serbııalyq Dýshan Laıovıchtiń mysyn basty.
Qazaqstandyq sportshy 6:2, 6:4, 7:6 (7:4) esebimen jeńiske jetti.
Eki saǵat 15 mınýtqa sozylǵan báseke barysynda Shevchenko 3 eıske qosa 8 breık-poınttyń beseýin múlt jibergen joq. Laıovıch 3 eıs, 2 breıkpen (8 breık-poınt) kózge tústi.
Aleksandr Shevchenko kelesi aınalymda álemniń 17-raketkasy, bolgarııalyq Grıgor Dımıtrov nemese reıtıngide 106-satydaǵy amerıkalyq Itan Kýınnyń qaı jeńgenimen talasady.
A.Shevchenko ótken jyly Frantsııa ashyq chempıonatynda ekinshi aınalymnan asa almaǵan edi.
Qazaqstandyq tennısshi qazirgi sátte ATP Live reıtıngisinde 100-orynǵa kóterilip tur.
Eske sala keteıik, budan buryn Tımofeı Skatovtyń Italııadaǵy týrnırdiń ekinshi aınalymyna ótkenin jazǵan bolatynbyz.