Aleksandr Shevchenko Frantsııadaǵy jarysta eki kezdesýin sátti ótkizdi

ASTANA. KAZINFORM — Qazaqstannyń ekinshi, álemniń 84-raketkasy Aleksandr Shevchenko Po (Frantsııa) chellendjer týrnıriniń shırek fınalyna ótti.

Jarystyń 2-raketkasy bolyp tirkelgen qazaqstandyq tennısshi aldymen kort ıesi, reıtıngide 198-oryndaǵy frantsııalyq Kleman Shıdehti 6:4, 7:6 (8:6) esebimen utty. 

A.Shevchenko ekinshi aınalymda reıtıngide 170-satydaǵy estonııalyq Danııl Glınkamen sheberlik baıqasty. 

Eki saǵattan astam ýaqytqa sozylǵan kezdesýde qazaqstandyq sportshy tarazy basyn ózine aýdara aldy — 6:3, 6:7 (7:9), 6:1.

Aleksandr Shevchenko jartylaı fınalǵa shyǵý úshin álemniń 282-raketkasy, germanııalyq Genrı Skvaırmen talasady. 

Taǵy bir qazaqstandyq Tımofeı Skatov alǵashqy aınalymda 2 saǵat 55 mınýtqa sozylǵan matchta frantsııalyq Artýr Býkege ese jiberdi — 6:4, 4:6, 6:7 (5:7).

Al Mıhaıl Kýkýshkın frantsııalyq Bendjamın Bonzıdan utylyp qaldy — 7:5, 6:7 (3:7), 6:7 (3:7). Bul báseke 3 saǵat 17 mınýtta aıaqtaldy.

Atalmysh jarystyń júlde qory 203,9 myń eýroǵa baǵalanǵan. Jeńimpaz 30 460 eýroǵa qosa 125 reıtıngilik upaıǵa ıe bolady.

Qazirgi kezde A.Shevchenko ATP Live reıtıngisinde 79-orynǵa kóterilip tur.

Eske sala keteıik, budan buryn Anna Danılınanyń Doha týrnıriniń jartylaı fınalynda oınaıtynyn jazǵan edik. 

Elena Rybakınanyń jeńis serııasy Doha týrnırinde toqtady.

Aleksandr Býblık alǵash ret Rotterdam týrnıriniń shırek fınalyna shyqty.