Aleksandr Shevchenko Almaty Open týrnıriniń irikteý kezeńiniń fınalyna shyqty
ASTANA. KAZINFORM — 17 qazanda Almatyda Almaty Open ATP 250 halyqaralyq tennıs týrnıriniń irikteý kezeńi bastaldy. Qazaqstandyq tennısshi Aleksandr Shevchenko irikteý saıystarynyń alǵashqy aınalymynan sátti ótti.
ATP álemdik reıtınginde 111-orynda turǵan 24 jastaǵy qazaqstandyq tennısshi irikteý kezeńinde úshinshi nómirmen tirkeldi. Onyń qarsylasy álemdik reıtıngte 178-orynda ornalasqan estonııalyq Danıel Glınka boldy.
Tartysty ótken kezdesý úsh setke sozyldy. Shevchenko alǵashqy partııany 6:3 esebimen senimdi aıaqtady. Alaıda ekinshi sette taı-breıkte 6:7 (3:7) esebimen qarsylasyna jol berdi. Sheshýshi partııada qazaqstandyq tennısshi oıyn barysyn óz paıdasyna ózgertip, 7:5 esebimen jeńiske jetti.
Kezdesý Aleksandr Shevchenkonyń paıdasyna 6:3, 6:7 (3:7), 7:5 esebimen aıaqtaldy. Match 2 saǵat 8 mınýtqa sozyldy.
Osy ýaqyt ishinde qazaqstandyq tennısshi jeti eıs jasap, eki qos qatelik jiberdi. Sondaı-aq Shevchenko qarsylasynyń jalǵyz breık-poıntyn qaıtardy.
Osy jeńistiń arqasynda Aleksandr Shevchenko Almaty Open ATP 250 týrnıriniń irikteý kezeńiniń fınalyna joldama aldy. Endi ol negizgi kezeńge shyǵý úshin baq synaıdy.
Eske salaıyq, buǵan deıin qazaqstandyq tennısshilerdiń Almaty ATR 250 týrnırindegi qarsylastary anyqtalǵanyn jazǵan edik.
