Aleksandr Shevchenko Adelaıda týrnırinde azýly qarsylasyn kambekpen jeńdi

ASTANA. KAZINFORM – Qazaqstannyń ekinshi, álemniń 104-raketkasy Aleksandr Shevchenko Adelaıda (Aýstralııa) ATP 250 týrnıriniń ekinshi aınalymyna ótti.

Jarysty irikteý saıystarynan bastaǵan qazaqstandyq tennısshi alǵashqy aınalymda álemniń 66-raketkasy, bosnııalyq, 33 jastaǵy tájirıbeli Damır Djýmhýrmen betpe-bet keldi.

Birinshi partııada bosnııalyq sportshy 6:4 esebimen basymdylyq tanytty. Budan keıin Shevchenko oıyn tizginin qolyna alyp, kambek jasaı bildi – 6:4, 7:5.

Eki saǵat jarymǵa jýyq ýaqytqa sozylǵan tartysty básekede A.Shevchenko 7 eıspen birge 10 breık-poınttyń altaýyn óz esebine jazdy. Djýmhýr 1 eıs, 5 breıkpen (9 breık-poınt) kózge tústi.

Aleksandr Shevchenko shırek fınalǵa shyǵý úshin álemniń 55-raketkasy, majarstandyq Marton Fýchovıch nemese reıtıngide 78-oryndaǵy amerıkalyq Itan Kýınnyń qaı jeńgenimen talasady.

Eske sala keteıik, budan buryn Qazaqstannyń tennısten álemdegi úzdik elderdiń qataryna engenin jazǵan edik.