Aleksandr Panfılov: ulttyq qurama 1998 jylǵy júldeden keıin Olımpıada oıyndarynda úzdik nátıje kórsetti
ASTANA. KAZINFORM — Konkımen júgirý sportynan Qazaqstan ulttyq quramasynyń bas bapkeri Aleksandr Panfılov Olımpıada oıyndary aıasynda ótken alǵashqy jarys kúnin qorytyndylady.
Eske sala keteıik, 7 aqpanda Italııada ótip jatqan 2026 jylǵy qysqy Olımpıada oıyndarynda konkımen júgirýden jarystar bastaldy. Alǵashqy júldeler áıelder arasynda 3000 metr qashyqtyqta sarapqa salyndy.
Bul qashyqtyqta Nadejda Morozova altynshy orynǵa turaqtasa, Elızaveta Golýbeva onynshy nátıje kórsetti.
— Nadejda Morozova óte joǵary deńgeıde óner kórsetti. Sonymen qatar Elızaveta Golýbeva da úzdik ondyqqa endi. Aıta ketý kerek, buǵan deıin Olımpıada oıyndaryndaǵy eń úzdik nátıjemiz 2014 jyly tirkelip, jetinshi oryn alǵan edik. Árıne, 1998 jyly Lıýdmıla Prokasheva jeńip alǵan tarıhı qola medaldi esepke almadym. Men sol júldeden keıingi kórsetkishter týraly aıtyp otyrmyn.
Alǵashqy kún biz úshin óte sátti ótti. Onyń ústine 3000 metr — qyzdardyń negizgi qashyqtyǵy emes. Olar kóbine 1000 jáne 1500 metrge mamandanǵan. Sondyqtan bul nátıje bizge úlken úmit syılaıdy. Sondaı-aq búgin jeńimpazdyń nátıjesi bárimizdi tańǵaldyrdy. Altyn júldeni Francheska Lolobrıdjıda jeńip aldy. Ol maýsym barysynda mundaı nátıje kórsetpegen edi. Biraq óz elińniń qoldaýy seziledi ǵoı. Sonymen qatar juby da myqty boldy. Kanadalyq sportshy da júldegerler qataryna endi. Bizge jup jaǵynan sál sáttilik jetpedi. Degenmen sportshylarymyz laıyqty óner kórsetti. Nátıjege kóńilimiz tolady. Barsha jankúıerge qoldaý kórsetkeni úshin alǵys aıtamyz, - dedi bas bapker.
Eske sala keteıik, buǵan deıin qysqy Olımpıada oıyndarynyń konkımen júgirý jarysynda Nadejda Morozova 6-oryn alǵanyn jazǵan edik.