Aleksandr Nevskııdiń Quran aıattary jazylǵan dýlyǵasy jónindegi tarıhı derek
ASTANA. QazAqparat - Ataqty orys qolbasshysy Aleksandr Nevskııdiń altyn áriptermen Quran aıattary jazylǵan dýlyǵasynyń tarıhshylar arasyndaǵy daý-damaıdyń bastaýyna aınalǵanyna birshama ýaqyt boldy.
Áıgili qolbasshynyń dýlyǵasy jaý oǵy jaralaı almaıtyndaı berik quıylǵan bul dýlyǵany Nevskııden keıin orys patshasy Mıhaıl Romanov kıgen. Arab kallıgrafııasymen órnektelgen bundaı bas kıimder ataqty Ivan Groznyı men knıaz Fedor Mstıslavskııde de bolǵan.
Osy bir qyzyqty derekterdi saraptaǵan orys tarıhshylary uzaq ýaqyt boıy dýlyǵany orys sheberleri quıǵan, al arab tilindegi aıattardy kórnekilik úshin paıdalanǵan dep kelgen bolatyn. Degenmen, olardyń bul joramaldary naqty aıtylǵan synǵa jaýap bere almaı kelgen edi. Al, jaqynda orys baspasóz betterinde bul dýlyǵanyń orys qolbasshysyna Altyn Orda bıleýshileriniń tarapynan syılyqqa berilgeni týraly tarıhı derek jarııalandy, dep jazady muslim.kz.
Bul jaıynda zertteýshi Saıat Rahymberdi bylaı deıdi: «Arab jazýymen órnektelgen dýlyǵalardyń barlyǵy da Altyn Orda astanasy Saraı-Batýda jasalǵan. Altyn Orda ámirshisi Batý hannyń ózi de, onyń ákesi men atasy da qolóner sheberlerin joǵary baǵalaǵan. Sol kezdegi Saraı-Batý shahary túgeldeı sheberlerdiń qalasy bolǵan desek te qatelespeımiz. Qala turǵyndarynyń basym kópshiligin qarý-jaraq soǵýshylar, temirden túıin túıgen qolóner sheberleri quraǵan.
Aleksandr Nevskıı dýlyǵasyna keler bolsaq, onyń Altyn Orda bıleýshilerimen jaqsy qarym-qatynasta bolǵany belgili. Batý hannyń urpaǵy Sartaqtyń Nevskıımen tamyrlas bolyp, bir-birine tartý jasaǵan. Alaıda, Sartaq bar bolǵany bir-aq el bılegen. Odan keıin han taǵyna ıslam dinin qabyldaǵan Berke han otyrǵan bolatyn».
